Zhytet anija me 140 pasagjerë në Indonezi, gjashtë persona humbin jetën – publikohen pamjet rrëqethëse (Foto/Video)

Të paktën gjashtë persona kanë humbur jetën, pasi një anije që transportonte 140 persona është zhytur në brigjet e Indonezisë, duke bërë që dhjetëra vetura që ishin në anije të bien në ujë.

Autoritet përkatëse kanë angazhuar ekipet të shpëtimit për t’i nxjerrë nga uji pasagjerët që ishin në anijen KM Lestari, që u zhyt në bregun e ishullit Sulawesi në lindje të Borneos, transmeton Telegrafi.

Pasagjerët e tmerruar me atë çfarë po ndodhte, janë filmuar duke vrapuar për t’i marrë jelekët me ajër dhe më pas kërcenin me qëllim që të mos përfundojnë nën ndonjë veturë, apo mjet tjetër të rëndë që binin në ujë.

Raportohet se anija ishte zhytur kur dallgët mbi 13 metra të larta goditen anijen që po lëvizte me shpejtësi të vogël, duke bërë që njëra pjesë e saj të zhytet menjëherë.

Ende nuk dihet se sa persona deri më tani janë shpëtuar nga ekipet që kanë dalur në vendin e ngjarjes, ndërsa është konfirmuar se deri më tani kanë humbur jetën të paktën gjashtë persona.

Sipas mediave lokale, jelekët me ajër nuk ishin të mjaftueshëm për të gjithë pasagjerët që ishin në anije. /Telegrafi/