Zharku zgjidh dilemën se i kujt ishte vendimi për ndaljen e trenit

Ministri i Infrastrukturës, Lutfi Zharku, ka deklaruar se vendimi për ndaljen e trenit i cili ishte nisur nga Serbia në drejtim të Kosovës, është marrë në koordinim me institucionet e Kosovës, duke përfshirë presidentin e kryeministrin.

“Unë kam marrë vendim në bazë të kompetencave, kërkesa është ardhur nga Autoriteti i i Hekurudhave, unë kam kërkuar nga policia që të ndalet treni i cili ishte ilegal dhe nuk ka pasur licenca për të vepruar në Kosovë”, ka thënë Zharku.

Ministri Zharku këto komente i bëri sot në emisionin IMAZH, në Radio Televizionin e Kosovës.

Sipas tij, çështjet e ndjeshme nuk diskutohen në publik, pasi që në raste të tilla është dashur që të analizohet situata.

Ai tha se kërkesa ka qenë publike që të mos lejohet futja e trenit në Kosovë.

Zharku ka thënë se që nga paslufta ka qarkulluar treni humanitar nga Hani i Elezit në Leshak.

“Qeveria e Kosovës nuk ka ndërhyrë, pasi që ka vepruar nga koha e Ish-UNMIK-ut. Ai tren ndihmon në qarkullimin e udhëtarëve në atë pjesë të Kosovës”, ka thënë ai.

Zharku ka thënë se problemi i veriut është në bisedime.