Zhan Mitrev me letër drejtuar Komitetit të Helsinkit: Ka një sulm të organizuar kundër meje

Zhan Mitrev u dërgoi letër përfaqësuesve të Komitetit të Helsinkit në Maqedoni me kërkesë që të reagojnë për shkeljen e të drejtës themelore për informimin e opinionit publik lidhur me rastin kundër tij dhe klinikës Zhan Mitrev. Me anë të kësaj letre, doktor Mitrev u bën thirrje që ta ndjekin rastin në sallën e gjyqit dhe të reagojnë, sepse nuk bëhet fjalë vetëm për një krim të pretenduar, por edhe për mosespektim të të drejtave të njeriut.

“Në periudhën e kaluar personalisht kam qenë i sulmuar para opinionit publik, veçanërisht nga një sërë shkrimesh në portalin DokazM, për të cilin tashmë kam paraqitur kallëzim penal. Po shkelet e drejta ime për t’u përgjigjur sepse çdo përpjekje e imja për të kontaktuar me gazetar perfundon me dënim publik ndaj tij, dhe duhet pasur parasysh që kjo është e vetmja mënyrë që unë kam për të “mbrojtur” veten përballë gjykatës dhe sigurisht përballë publikut që informohet nga mediat”, thuhet në letrën e Dr. Mitrevit.

Dr. Mitrev në letër i referohet të drejtave të njeriut që janë të garantuara me kushtetutën tonë dhe ku garantohet e drejta për të shprehur publikisht fjalën.

“Unë kam bërë betimin e Hipokratit dhe kjo mua më drejton në punën time të përditshme, jam i pastër para vetes dhe para veprimeve të mia sepse e di që e vërteta është në anën time. Por, ju kërkoj të reagoni ndaj rasteve kur ushtrohet presion ndaj meje dhe punonjësve të mi dhe secili prej nesh të çlirohet nga barra e presionit. Ne kujdesemi për mijëra pacientë dhe asgjë nuk duhet të dëmtojë profesionin tonë dhe shëndetin e qytetarëve”, theksoi doktor Mitrev.

Doktor Mitrev në këtë letër i referohet edhe rastit me pronarin e portalit DokazM, i cili ka marrë informacion nga hetuesja për rastin konkret dhe i ka bërë ato publike në portalin e tij.

“Kemi qenë dëshmitarë se hetuesja së bashku me Marjan Stamenkovskin nga DokazM kanë drejtuar sulm të organizuar kundër meje, ku mbetet ende për tu parë se kush janë personat e tjerë të përfshirë. Sulmet dhe kërcënimet e organizuara nuk duhet të jenë pjesë e jetës sonë të përditshme. Ju si Komitet i Helsinkit e dini mjaft mirë këtë. Prandaj ju bëj thirrje të reagoni dhe ta ndiqni rastin tim edhe në sallën e gjyqit, sepse nuk bëhet fjalë vetëm për krim të pretenduar, por edhe për mosrespektim të të drejtave të njeriut”, përfundon letra e Mitrevit.