Zelensky: Shteti mëkatar do të mbajë përgjegjësi për çdo akt terrori kundër ukrainasve

Gjatë javës, forcat ruse kanë granatuar një numër qytetesh të Ukrainës. “Shteti mëkatar” do të mbajë përgjegjësi për çdo akt terrori kundër ukrainasve.

Kështu ka thënë presidenti Volodymyr Zelensky në fjalimin e tij tradicional të radhës drejtuar kombit, transmeton Ukrinform, përcjell Telegrafi.

“Kamianske në rajonin Zaporizhzhia, Beryslav në rajonin Kherson, Marhanets në rajonin Dnipropetrovsk, Avdiivka, Kramatorsk dhe Kostiantynivka në rajonin e Donetsk, Kostiantynivka në rajonin Sumy… Dhe dhjetëra e dhjetëra qytete dhe fshatra të tjerë ukrainas që janë goditur nga terroristët rusë këtë javë vetëm. Ngushëllimet e mia për të gjithë ata që kanë humbur të afërmit e tyre, të dashurit e tyre…”, ka thënë kreu i shtetit ukrainas.

Presidenti siguroi se “shteti mëkatar do të mbajë përgjegjësi për çdo akt terrori kundër ukrainasve” dhe u kujtoi ukrainasve se Gjykata Ndërkombëtare Penale lëshoi një urdhër arresti për presidentin rus Vladimir Putin.

Lexo po ashtu Ish-oficeri i inteligjencës britanike shpjegon “tri mesazhet” që Putini dëshiron të dërgojë me vizitën në Mariupol

“Me këtë bëhet e pamohueshme se fundi i këtij agresioni për Rusinë do të ketë gamën e plotë të përgjegjësisë së saj. Përgjegjësia për çdo goditje në Ukrainë, për çdo jetë të shkatërruar, për çdo fëmijë ukrainas të deportuar… Dhe, sigurisht, për çdo manifestim të destabilizimit të botës të shkaktuar nga agresioni rus”, tha Zelensky.

Deklaratat e tij vijnë në kohën kur Vladimir Putin bëri një vizitë në qytetin ukrainas të Mariupol.

Bëhet fjalë për vizitën që besohet të jetë vizita e parë e presidentit rus në territorin e pushtuar në rajonin e Donbasit që nga fillimi i agresionit në Ukrainë. /Telegrafi/