Xhamitë financohen nga Serbia”, Bytyqi – Gashit: Me vetëdije jeni duke i shërbyer Serbisë

Avokati Asdren Bytyqi ka thënë se deklarimet se disa nga xhamitë në Kosovë financohen nga Serbia, përveç që janë të ndjeshme, përbëjnë edhe cenim të sigurisë kombëtare.

Bytyqi i është drejtuar ish-zëvendësministrit për Komunitete Milazim Gashi se është duke i shërbyer me vetëdije Serbisë, i cili deklaroi se shërbimet sekrete serbe financojnë xhami në vend.

“Faji më i madh për këto fakte të pavërtetuara, që janë të ndjeshme, që kanë të bëjnë me sigurinë kombëtare, edhe nuk kanë të bëjnë vetëm me brumin e ndërtimit të xhamive, por ka të bëjë me aspektin e shoqërisë, sikurse komandantët, të cilët janë figura të respektit në shoqëri. Janë mjaft të ndjeshme dhe përbëjnë cenim të sigurisë kombëtare. Në rast se do të ishte vërtetë, kjo përbën elemente për hetime në prokurori, për arsye se ka të bëjë më financim ndërkombëtar…”.

“Unë mendoj që me vetëdije jeni duke i shërbyer Serbisë, sepse qëllimi përfundimtar i saj është para një përplasje, para një konfliktit të mundshëm i cili parashikohet padyshim një përçarje e madhe e popullit është përçarja fetare, ajo që iu shërben juve…”, ka thënë Bytyqi, në “Debat plus” të RTV Dukagjini.

Lexo po ashtu Gashi: Para 20 vitesh shërbimi informativ serb ka draftuar plan për financimin e xhamive në Kosovë

Ndryshe, Gashi vazhdon të deklarojë se Serbia qëndron pas financimit të disa xhamive në Kosovë.

Sipas tij, shërbimi informativ serb ka draftuar një plan-program për financimin e xhamive që Kosova të paraqitet si një vend islamik para ndërkombëtarëve.