Polemika të reja kanë dalë në pah rreth rikthimit të dështuar të Lionel Messit te Barcelona në vitin 2023, pas pretendimeve kontradiktore nga figurat e përfshira në atë kohë.
Ish-trajneri i Barçës, Xavi, deklaroi së fundmi se La Liga e kishte miratuar rikthimin e Messit dhe fajësoi presidentin e klubit, Joan Laporta, për bllokimin e transferimit.
“Leo u transferua… kishim dritën jeshile nga La Liga, por ishte presidenti ai që i prishi të gjitha”, tha Xavi, duke shtuar se Messi nuk u rikthye sepse “presidenti nuk e do atë”.
Presidenti i LaLigës, Javier Tebas, e hodhi poshtë shpejt atë version, duke këmbëngulur: “Nuk është e vërtetë. La Liga nuk autorizoi asgjë”.
Megjithatë, ish-drejtori i Barcelonës, Mateu Alemany, tani e ka mbështetur rrëfimin e Xavit.
“Xavi ka të drejtë. Na thanë se e kishin autorizuar. Xavi ka të drejtë”, tha Alemany, duke rindezur debatin se pse nuk u realizua kurrë rikthimi i argjentinasit. /Telegrafi/
