Wayne Rooney lidhet me një rikthim sensacional në Ligën Premier tek klubi i njohur

Wayne Rooney pritet që të bëjë rikthimin në stol pak javë pasi u lirua nga detyrat si trajner i Plymouth Argyle. 

39-vjeçari ndau rrugët me Plymouth më 31 dhjetor pasi kishte udhëhequr klubin drejt katër fitoreve, gjashtë barazimeve dhe 13 humbjeve në 23 ndeshje në Championship. 

Rooney më parë ka drejtuar ekipe si DC United, Derby County dhe Birmingham City, por nuk ka arritur që të sjellë suksese tek ndonjëra nga këto klube të përmendura. 

Sipas një raportimi nga talkSPORT, ish-reprezentuesi anglez është lidhur me një rikthim sensacional tek klubi i tij i fëmijërisë Everton. 

Sean Dyche u shkarkua nga pozita e tij si trajner i Evertonit vetëm pak orë para fitores me rezultat 2-0 ndaj Peterborough të enjten, duke bërë që dyshja Leighton Baines dhe Seamus Coleman ta udhëheqin skuadrën në atë takim. 

Është ende e paqartë nëse Rooney është i gatshëm të rikthehet në stol kaq shpejtë pas largimit nga Plymouth. 

Momentalisht, kandidati kryesor për të marrë drejtimin e Evertonit është David Moyes i cili thuhet se ka mbajtur madje edhe një takim me drejtuesit e klubit. 

Rooney në të kaluarën ishte shprehur se ai do të bëhet një ditë trajner në Ligën Premier gjatë një konference për shtyp. 

“Everton kontaktoi agjentin tim dhe i kërkoi një intervistë, të cilën unë e refuzova. Unë besoj se do të bëhem trajner në Ligën Premier dhe jam 100 për qind i gatshëm dhe nëse do të jetë Evertoni një ditë në të ardhmen, do të ishte fantastike”, kishte thënë Rooney./Telegrafi/