VV-ja në Mitrovicë e shpalli në kërkim Hamzën, nënkryetari: Veprim dhe aksion shumë i palogjikshëm

Sot, aktivistët e Vetëvendosjes e kanë shpallur në kërkim kryetarin e Komunës së Mitrovicës, Bedri Hamza, përmes një pankarte të vendosur para objektit të Komunës së Mitrovicës.

Kjo pankartë u vendos gjatë konferencës së sotme të Lëvizjes së Vetëvendosjes – Dega në Mitrovicë, shkruan Telegrafi.

Në pankartë shkruhej “Mitrovica pa kryetar, ku është Bedri Hamza?”.

Për këtë çështje, nënkryetari i Komunës së Mitrovicës, Arian Tahiri për Telegrafin ka thënë se këtë e vlerëson si “akt të palogjikshëm”.

“Përderisa disa asamblistë të Vetëvendosjes të cilët kanë qenë brenda sallës së Kuvendit Komunal, realisht ata janë shmangur dhe kanë ikur nga përgjegjësia sepse kryetari në ato momente ka qenë bashkë me asamblistë tjerë në seancë duke kryer punën me përkushtim dhe përgjegjësi”, ka thënë Tahiri.

Ai ka thënë se kjo ishte një “tendencë për të propaganduar opinionin”, transmeton Telegrafi.

“Veprim dhe aksion shumë i palogjikshëm me tendencë të propagandojnë opinionin me mjetet të cilat i dijmë që i përdorin”, ka thënë ai.

Më tej, Tahiri është shprehur se këtë e sheh edhe si “rezultet i panikut që i shihin sondazhet dhe frymën e mirë të të gjithë qytetarëve të Mitrovicës”.

“E shoh si rezultat i panikut që i shohin sondazhet dhe frymën, përcepsionin e vullnetin e mirë të të gjithë qytetarëve të Mitrovicës, por edhe të gjithë Kosovës”, ka shtuar Tahiri.

Sipas nënkryetarit, kryetari Hamza nuk mungon në asnjë seancë dhe se është në punë çdo ditë.

“Në atë moment kur është mbajtur aksioni ose konferenca, kryetari ka qenë brenda, e asamblistët e Vetëvendosjes që do të duhej të ishin në seancë, e kanë bojkutuar seancën, kanë dalë jashtë dhe kanë pyetur se ku është Bedri Hamza. Shih sa e palogjikshme”, ka përfunduar nënkryetari i Komunës së Mitrovicës, Arian Tahiri.

Telegrafi ka provuar të kontaktoj edhe me kryetarin Bedri Hamza, por i njëjti nuk ka qenë i qasshëm. /Telegrafi/