Vlerësohet e gabuar përplasja “vëllazërore” Kurti-Rama në seancën solemne

Kritikat në Prishtinë të kryeministrit të Shqipërisë Edi Rama ndaj homologut Albin Kurti, po vlerësohen si të gabuara nga njohës të zhvillimeve politike. Ata thonë se kritikat është dashur të adresohen në një takim bilateral mes liderëve, e jo në një seancë solemne në mes dy vendeve sikur ajo e djeshmja.

Kryeministri i Shqipërisë e “goditi” homologun nga Kosova gjatë fjalimit në seancën solemne mes dy Kuvendeve në Prishtinë.

Përveç kritikave për mosveprim ndaj zhvillimeve të vlerësuara si të padrejta në gjykimin ndaj ish-krerëve të UÇK-së në Hagë, Rama i dha leksione Albin Kurtit edhe si ta drejtojë dialogun me Serbinë.

Këtë retorikë nuk e lavdëron analistja Magbule Shkodra, e cila thotë se nuk ishte vendi e as momenti për ta përdorur atë.

Lexo po ashtu Mbledhja e përbashkët e kuvendeve të Kosovës dhe Shqipërisë, gjithçka që u tha aty

“Unë do ta preferoja që kryeministri Edi Rama, një gjë të tillë ta bënte ndoshta në ndonjë takim bilateral në mes tij dhe kryeministrit Kurti, por ja që ai e zgjodhi këtë mënyrë edhe kjo flet më shumë se raportet e tyre në fakt ashtu siç edhe ne kemi thënë në të kaluarën dhe e kemi parë, nuk janë në nivelin e duhur”, ka thënë Magbule Shkodra, analiste politike.

Megjithatë Shkodra thotë se kritikat e Ramës duhet pranuar dhe nuk duhet të pritet që ai të jetë gjithmonë përkrahës ndaj Kosovës.

Shkodra, por edhe analisti nga Shqipëria Ben Andoni thonë se fjalimet e tilla mund të lidhen me shkaqe elektoral, pasi dy shtetet shqiptare gjenden në prag të zgjedhjeve.

Të dy analistët pajtohen se kryeministri Kurti ishte më i matur në fjalimin e tij.

Lexo po ashtu Bardhi replikon me Ramën: Kritika dhe këshilla për vëllain nuk jepet në publik, janë si thika pas shpine

“Për Zotin, Kurti po mendoj që ishte shumë i kujdesshëm, mbas fjalimit ku ai mbajti me 2 dhjetor, në këtë fjalim që mbajti dje ai u mundua të ishte i kujdesshëm dhe duke përdorur më shumë në planin e brendshëm”, ka thënë Ben Andoni, analist politik.

Kritika për Kurtin, madje të ashpra adresoi edhe kryetari i AAK-së, Ramush Haradinaj./Dukagjini/