Villar për president të UEFA-s

Angel Maria VIllar kërkon presidencën e UEFA-s.

66-vjeçari spanjoll aktualisht në postin e zëvendësit të Michel Platini do të presë vendimin që do të japë gjykata e arbitrazhit sportiv në Lozanë, CAS përsa i përket francezit, për të shpallur përfundimisht kandidaturën për tu bërë numri 1 i qeverisë së futbollit evropian.

Villar i cili aktualisht mban edhe postin e presidentit të federatës spanjolle të futbollit ka si objektiv kryesor të shndërrohet në pasardhësin e Michel Platini në krye të UEFA-s.

Me shumë gjasa maksimumi që mund të përfitojë francezi në CAS, mund të jetë një ulje e dënimit prej 6 vjetësh që Platini ka marrë nga komisionet juridike të FIFA-s. Nëse ish lojtarit të Juventusit dhe përfaqësues së gjelave do t’i lihet në fuqi skualifikimi, Platini nuk do të ketë rrugë tjetër veçse të lëshojë postin e presidentit të UEFA-f pasi kështu thotë rregullorja.

Në këtë mënyrë qeveria e futbollit Evropian në muajin maj do të organizojë zgjedhjet e reja. Në këto kushte Angel Maria Villar është gati të shndërrohet në presidentin e ri të UEFA-s, pasi kandidatura e tij është thuajse e sigurt.

Ish i mesfushori i Athletic Bilbaos në vitet 70-të ka shanse të mëdha për të fituar në këtë garë. Për Villar marrja e drejtimit të UEFA-s do të ishte maksimumi për të në një post drejtuesi sidomos që ky emërim mund të vijë vetëm pak muaj pasi 66-vjeçari rrezikoi pezullimin nga gjykata e arbitrazhit sportiv në Spanjë.