VV: Astriti është vrarë për shkak se ka qenë aktivist i yni, drejtësia nuk duhet të ndalet para fajtorëve edhe nëse ata ndodhen në hierarkinë e pushtetit

Lëvizja Vetëvendosje përmes një deklarate për media, ka komentuat konstatimet e raportit të Institutit të Mjekësisë Ligjore në Lozanë, ku sipas familjarëve dhe avokatit Tomë Gashi, u tha se Astrit Dehari është vrarë.

Vetëvendosje ka theksuar se Astriti është vrarë shkaku që ka qenë aktivistit i saj, duke kërkuar që të fillojnë hetimet sa më parë, të pavarura, të drejta dhe profesionale.

Lexo po ashtu Konstatimet e institutit zviceran në rastin Dehari: Hipoteza e vetëvrasjes së Astritit duket pak e vërtetë, nevojitet hetim i ri

Njoftimi i plotë:

Astrit Dehari është vrarë për shkak se ka qenë aktivist i Lëvizjes VETËVENDOSJE!

Këtë e ka thënë edhe raporti i ekspertëve të mjekësisë ligjore nga Shqipëria e Mbretëria e Bashkuar, këtë e thotë tani edhe raporti i ekspertëve të Qendrës Universitare Romande për Mjekësi Ligjore (CURML) në Lozanë të Zvicrës, këtë e ka thënë vetë trupi i Astrit Deharit.

Prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit. Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje?

Lexo po ashtu Familja Dehari: Raporti zviceran konstatoi se Astriti është vrarë

Znj. Xhemile Dehari, znj. Arta Boshtraj Dehari dhe z. Avni Dehari së bashku me avokatin z. Tomë Gashi kërkojnë që hetimet të fillojnë sa më parë. Ata falënderuan të gjithë ata që ndihmuan për informim të drejtë mbi rastin, dhe ata që mbajtën besimin e drejtë se kjo është vrasje tërësisht politike.

Lëvizja VETËVENDOSJE! poashtu kërkon që hetimet të fillojnë sa më parë, të pavarura, të drejta dhe profesionale. Qytetarët e Republikës së Kosovës, e gjithë shoqëria dhe shqiptarët kudo që ndodhen nuk janë të qetë deri sa të vihet drejtësia për Astritin. /Telegrafi/