Një vetaksident me fatalitet ka ndodhur këtë të diel në magjistralen Pejë-Prishtinë, saktësisht tek Parku i Biznesit.
Lajmin për Telegrafin e ka konfirmuar zëdhënësi i Policisë në rajonin e Prishtinës, Daut Hoxha.
"Rreth orës 19:00, në magjistralen Pejë -Prishtinë është raportuar për një aksident të rëndë trafiku, ku dyshohet se drejtuesi i automjetit ka humbur kontrollin mbi automjetin dhe është vetaksidentuar për vdekje", tha ai.
Njësitet relevante policore dhe ato të emergjencës kanë dalë në vendin e aksidentit dhe po merren me rastin.
Tutje ka apeluar për kujdes dhe respektim të rregullave në rrugë - në veçanti respektimin e kufizimeve të shpejtësisë.
"Humbja e jetëve njerëzore nëpër rrugët tona si pasojë e shpejtësisë referuar edhe raportimeve sot, është tepër shqetësues për të gjithë", u shpreh Hoxha.
Ndërkaq më herët një tjetër aksident ndodhi në Koshare. Katër persona mbetën të vdekur ndërkaq një grua e lënduar, e cila është duke u trajtuar në QKUK./Telegrafi.
