Menaxheri i Manchester Unitedit, Louis van Gaal, ka pohuar se ekipi i tij duhet të fitojë të mërkurën ndaj Crystal Palacet, përndryshe do t’i shuanin shpresat për kualifikim në Ligën e Kampionëve.
Djajtë e Kuq janë në pozitën e pestë të Premier Ligës, katër pikë pas Manchester Cityt dhe Arsenalit, derisa kanë mbetur pesë ndeshje për t’u zhvilluar.
Unitedi ka humbur një nga katër takimet e fundit, por Van Gaal shpreson që ekipi i tij të fitojë nesër për të mbajtur gjallë shpresat evropiane, transmeton Koha.net.
“Ndeshja kundër Crystal Palace është e rëndësishme”, ka thënë Van Gaal në konferencën për media. “Duhet të fitojmë, është e rëndësishme kjo fitore sesa, për shembull, për Arsenalin ose Manchester Cityn, sepse ato janë katër pikë larg nesh”.
“Duhet ta shikojmë veten, duhet të fitojmë, përndryshe nuk mund të afrohemi. Ata kanë katër pikë më shumë se ne. Ne varemi prej tyre, por duhet t’u bëjmë presion duke fituar”.
Këtë vikend, Unitedi do të përballet me Evertonin në gjysmëfinalen e Kupës FA.