Ukrainasit planifikojnë të dëbojnë 500 mijë përfitues të luftës, të paktën 10 mijë njerëz në listën e zezë

Tamila Tasheva, përfaqësuesja e Ukrainës për Krimenë, tha se Ukraina do të zbatojë një qasje fleksibile ndaj bashkëpunëtorëve rusë gjatë çlirimit të planifikuar të Krimesë, raporton Newsweek.

Rreth 10,000 ukrainas pritet të futen në listën e zezë për bashkëpunim me autoritetet pushtuese ruse, ndërsa ata që i konsiderojnë “viktima” të pushtimit do të kursehen nga dënimi, transmeton Telegrafi.

Vlerësohet se qindra mijëra rusë janë vendosur në Krime që nga viti 2014, kur ajo u pushtua nga forcat ruse. Tasheva citon numrin midis 500,000 dhe 800,000 të ardhurve.

Të gjithë rusët që kanë hyrë ilegalisht do t’i nënshtrohen “dëbimit të detyruar”, tha ajo.

Lexo po ashtu Pjesëtarët e Wagner-it shihen për herë të parë pas rebelimit, një autokolonë arrin në bazë në Bjellorusi – edhe dy tjera janë rrugës

Tasheva thekson se shtrirja e fushatës do të varet nga mënyra e deokupimit dhe sjellja e rusëve. Rusët pritet të largohen nga Krimea përpara mbërritjes së forcave të armatosura ukrainase, dhe shumë do të përpiqen të ikin për të shmangur përballjen me drejtësinë.

Ukraina planifikon një vlerësim sistematik të atyre që mbeten, me një fokus të veçantë tek qytetarët ukrainas, pavarësisht nga shtetësia ruse që ata kanë marrë vullnetarisht ose nën presion që nga viti 2014.

Zyrtarët ukrainas po u bëjnë thirrje banorëve të Krimesë që të përgatiten për kthimin e forcave ukrainase. Krimea ka qenë nën kontrollin rus për gati një dekadë dhe shumë banorë shprehin më shumë simpati për Moskën, pjesërisht si rezultat i emigracionit rus dhe pranisë së një baze detare ruse në Sevastopol.

Lexo po ashtu Fillimisht mbrojti Kievin, më pas i dëboi rusët nga Kharkivi – kush është Oleksandr Sirsky truri i kundërofensivës ukrainase?

Ukraina do të verifikojë ish-zyrtarët që kanë bashkëpunuar me qeverinë okupuese, dhe atyre do t’u ndalohet të mbajnë poste qeveritare ose zyrtare për të paktën disa vjet. Në lustracion pritet të përfshihen rreth 10 mijë zyrtarë.

Ukraina po planifikon gjithashtu një amnisti për ata që nuk morën pjesë në krimet kundër njerëzimit, por theksohet se nuk do të tolerojë krime, veçanërisht kundër civilëve dhe pakicave si Tatarët e Krimesë.

Drejtësia do të kërkohet për autorët e krimeve të tilla, por shkallët e përfshirjes do të merren parasysh kur kemi të bëjmë me individë. /Telegrafi/