Ukraina synon të rimarrë pjesën më të madhe të Khersonit deri në fund të vitit

Forcat ukrainase kanë caktuar një afat për të rikthyer pjesën më të madhe të rajonit jugor të Khersonit nga Rusia deri në fund të vitit 2022.

Sipas Sky News, përcjell Telegrafi, zyrtarë të lartë amerikanë dhe zyrtarë ukrainas i thanë CNN se ka pasur disa suksese deri më tani dhe se plani është që të paktën të merret i gjithë territori në veri ose në perëndim të lumit Dnipro.

Këtu përfshihet qyteti i Khersonit dhe gjithashtu Nova Kakhovka, vendi i një hidrocentrali të rëndësishëm dhe kanali që furnizon Krimenë me sasinë më të madhe të ujit.

Po sipas Sky News, zyrtarët amerikanë thanë se kishin parë sukses ukrainas në sulmin e linjave ruse të furnizimit me synimin për të ndërprerë trupat ruse në perëndim të lumit Dnipro.

Ata ishin gjithashtu të vetëdijshëm për rimarrjen e disa fshatrave nga Ukraina.

SHBA raportoi gjithashtu disa aktivitete sulmuese ruse pranë Bakhmut në rajonin lindor të Donetsk.

Në fund të shkrimit thuhet se zyrtarët amerikanë thanë se qëllimi i Ukrainës ishte ambicioz, por mbetet i mundur. /Telegrafi/