Forcat e Armatosura të Ukrainës pritet të marrin gjithsej tre milionë dronë FPV deri në fund të vitit 2025, gati 2.5 herë më shumë se vitin e kaluar, ka njoftuar Ministri i Mbrojtjes Denys Shmyhal.
Njoftimi nënvizon përpjekjen e Kievit për të zgjeruar prodhimin vendas të armëve, ndërsa dronët luajnë një rol gjithnjë e më vendimtar në luftën në shkallë të plotë të Rusisë kundër Ukrainës.
"Roli i sistemeve pa pilot në fushën e betejës po rritet dhe për këtë arsye prodhimi i instrumenteve inovative të luftës është përparësia jonë numër një", tha Shmyhal .
Sipas ministrit, shumica e dronëve të përdorur nga forcat ukrainase prodhohen në vend.
Ai tha gjithashtu se Agjencia e Prokurimit të Mbrojtjes furnizoi ushtrinë me 2.4 milionë dronë FPV në vitin 2025, me shumicën e blerë përmes kontratave të drejtpërdrejta me prodhuesit.
200,000 dronë të tjerë u dorëzuan nëpërmjet sistemit IT të Mbrojtjes DOT-Chain, një platformë digjitale prokurimi e lansuar në fund të korrikut.
Shmyhal tha se Ukraina ka zgjeruar gjithashtu përdorimin e sistemeve robotike tokësore.
Gati 15,000 platforma të tilla iu dorëzuan Forcave të Armatosura në vitin 2025, tre herë më shumë se vitin e kaluar.
Ndryshe, dronët janë bërë thelbësorë për luftën moderne në Ukrainë, me forcat ukrainase dhe ruse që mbështeten në sisteme pa pilot për zbulim, shënjestrim artilerie dhe sulme precize. /Telegrafi/
