Lajme Kosovë

Tyrbja e ndërtuar 631 vite më parë dhe pema e mbjellur para 400 vitesh në Kosovë, mendohen të jenë më të vjetrat në vend

Para 4 vitesh

Gjërat e vjetra, të cilat i kanë mbijetuar kohës për vite të tëra, gjithmonë bartin më vete shumë histori dhe tradita. Në vendin tonë ka shumë të tilla, ndërsa një prej tyre është edhe tyrbja e Sulltan Muratit, e cila daton qysh nga viti 1389.

Tashmë në të janë bërë disa modifikime, mirëpo ky monument ka plotë 631 vite. E veçanta e saj, është që në tyrbe janë të varrosura vetëm organet e brendshme të Sulltan Muratit.

Në lidhje me këtë monument ka folur, Muamer Hasani, i cili shpjegoi edhe historinë e këtij vendi.

‘’Kur flasim për tyrben e ‘Sulltan Muratit’, duhet me e cekë që është arkitektura më e vjetër osmane në Kosovë, është ndërtu në shekullin e XIV, nuk dihet saktë mirëpo mendohet që është ndërtu menjëherë pas betejës së Kosovës, do të thotë menjëherë pas vitit 1389 dhe është ndërtu prej të birit të Sulltan Muratit, prej sulltan Bejazitit’’, tha Hasani.

E gjithë tyrbja, është e rrethuar me pemë të ndryshme, e ajo që bie ne sy, është pema e vjetër dhe e madhe në hyrje të saj. Kjo pemë ka mbi 400 vite që është mbjell aty, dhe besohet të jetë ndër pemët më të vjetra në Kosovë.

‘’E kena edhe një man apo dud e cila po ashtu është shumë i mahnitshëm, i cili është diku 400 ose 500 vjet i vjetër. Është qa në mes shkaku i peshës të madhe, domethënë u rritë, nuk ka mujt me bartë veten edhe është ça, dhe jam goxha i sigurt që nuk ka pemë më të vjetër në Kosovë, sa I përket familjes së manave ose dudave’’, u shpreh ai.

E në hyrje të saj gjendet edhe objekti kulturor. Disa nga gurët këtu janë origjinalë, pasi që i kanë mbijetuar kohës. E në dhomat aty pranë̈, që dikur janë shfrytëzuar edhe si bujtina, për të gjithë ata që kanë ardhur ta vizitojnë tyrben, gjërat janë modifikuar përgjatë shekujve, edhe pse janë të ngjashme me gjërat origjinale që kane qenë aty.

‘’Objekti që gjendemi tani i takon periudhës së shekullit XIX, dhe ndërtohet prej sulltan Adyl Hamitit të dytë, dhe ndërtohet si një bujtinë apo konak. Sepse njerëzit kur kanë ardhur ta vizitojnë tyrben, nuk kanë mundur të kthehen në të njëjtën ditë, pasi po flasim për një periudhë kur njerëzit kanë udhëtuar me kali’’, rrëfen ai.

E po ashtu, në njërën dhomë, ka disa fotografi të cilat i takojnë shekullit të 19, e që janë ruajtur deri më sot.

‘’Këtu janë të ekspozuara disa fotografi interesantë të vitit 1911, të cilat janë bërë me rastin e vizitës së sulltan Reshatit në Kosovë, saktë me 16 qershor. Këtu mund t’i shohim disa fotografi të tyrbes në atë kohë dhe mundemi me i pa të njëjtat këndë të tyrbes. Mundeni me pa dhe turmën e madhe të njerëzve, të cilët kanë dal me e prit sulltanin’’.

Në katin sipër janë edhe statujat, të cilat janë të punuara me dyll e që ilustrojnë figurat të cilat kanë jetuar aty, dhe të gjithë ata që dëshirojnë t’i shohin mund ta vizitojnë këtë vend që gjendet disa minuta vozitje prej Prishtine, në Mazgit të Obiliqit. /RTV Dukagjini/Telegrafi/