Thirrje nga numra të huaj në Viber, reagon Agjencia për Informim dhe Privatësi – jep disa rekomandime

Agjencia për Informim dhe Privatësi ka reaguar pasi kohëve të fundit janë ngritur shqetësime të adresuara nga qytetarët për thirrje telefonike nga numra të panjohur ndërkombëtarë përmes aplikacionit Viber.

Bazuar në parimet ligjore për mbrojtjen e të dhënave personale, përkatësisht Ligjit për Mbrojtje të të Dhënave Personale, Agjencia udhëzon të gjithë qytetarët të ndërmarrin hapat si në vijim:

-Ndiqni udhëzimet e Viber për trajtimin e thirrjeve të tilla: https://help.viber.com/hc/en-us

-Aktivizoni opsionin e ID-së së telefonuesit në cilësimet e llogarisë tuaj (Account Settings) për të parë se kush po telefonon, edhe nëse nuk janë të regjistruar në kontaktet tuaja.

-Nëse merrni telefonata të dyshimta, RAPORTONI ato si SPAM! Kjo do ta ndihmojë Viber-in të bllokojë këta numra dhe të mbrojë të tjerët që të mos bien viktimë e mashtrimeve.

“Mos harroni, siguria e të dhënave tuaja është në duart tuaja! Jini të kujdesshëm dhe ndiqni gjithmonë udhëzimet e aplikacionit tek rubrika “Të dhënat dhe Privatësia” (Data and Privacy)”, njofton tutje AIP.

Qytetarë të shumtë nëpër rrjete të ndryshme sociale janë ankuar se në numrat e tyre në viber kanë pranuar thirrje nga numra me prefiks jashtë Kosove./Telegrafi/