Thaçi dëshiron të ndërtojë marrëdhënie të afërta me Izraelin

Presidenti i ri i Kosovës, Hashim Thaçi, ka thënë se dëshiron të ndërtojë marrëdhënie me Izraelin, sipas një interviste me Ynet.

Izraeli deri më tani është përmbajtur nga njohja e Kosovës nga frika se do të krijonte precedent të padëshirueshëm në raport me konfliktin Izrael – Palestinë.

Dy vendet, megjithatë, kanë zhvilluar marrëdhënie të afërta viteve të fundit, shkruan Ynet.

“Jam i interesuar të punoj në zhvillimin e raporteve tona me Izraelin, në promovimin e marrëdhënieve në mes të qytetarëve të të dy vendeve, derisa Izraeli të ndjej se ndjehet komod që të na njohë”, ka thënë Thaçi për Ynet, transmeton Koha.net.

“Të gjithë aleatët e Izraelit e kanë njohur Kosovën”, ka vazhduar Thaçi. “Si rrjedhojë, është ironike që as Izraeli e as Autoriteti Palestinez nuk e njeh pavarësinë tonë. Palestina madje ka votuar kundër anëtarësimit të Kosovës në UNESCO”.

“Jam i përgatitur të ndihmoj në zgjidhjen e paragjykimeve për rastin në fjalë dhe të punoj me lidershipin e Izraelit në mënyrë që t’i zhvillojmë edhe më tutje marrëdhëniet tona miqësore”, ka thënë Thaçi.

“Si ministër i jashtëm, kam iniciuar themelimin e zyrës ndërlidhëse të Kosovës në Izrael. Shpresoj të jem presidenti i parë që do ta vizitoj Izraelin për ta inauguruar zyrtarisht këtë zyrë”, ka shtuar ai.

Thaçi ka thënë gjithashtu se e ka vizituar edhe më parë Izraelin, në kohën kur regjimi serb ka qenë ende në pushtet në Kosovë.

“Shpresoj ta vizitoj Izraelin përsëri. Kosova ka lidhje të vjetra dhe historike me Izraelin dhe me hebrenjtë në mbarë botën. Në vitin 2003 kam inauguruar një statujë në Prishtinë në kujtim të të gjithë hebrenjve kosovarë që janë vrarë në Hollokaust”, ka theksuar Thaçi për Ynet, transmeton Koha.net.

Ynet në fund thekson se shqiptarët kanë shpëtuar qindra hebre nga nazistët në Kosovë gjatë Luftës së Dytë Botërore, përfshi edhe ata që kanë hyrë në kufijtë e Kosovës për t’u strehuar.