Tevdovski: Nuk ka nevojë për marrëveshje me FMN-në, kufiri i moshës për pension nuk do të rritet

Maqedonia për momentin nuk ka nevojë për Marrëveshjen “Stand by” me Fondin Monetar Ndërkombëtar (FMN). Me FMN-në është dakorduar thellim i bashkëpunimit para së gjithash në nivel teknik përmes misioneve teknike.

Këtë e kumtoi sot ministri i Financave, Dragan Тevdovski, i cili tha se rreth masave që i ka propozuar FMN-ja, ekipi i të cilit në dy javët e fundit ishte në Maqedoni, konkludimi është se Qeveria do t’i përmbahet programit për punën dhe se këto janë kornizat në të cilat do të lëvizë, përcjell Telegrafi Maqedoni.

“Me FMN-në kemi bashkëpunim jashtëzakonisht pozitiv. Ekipet tona kanë punuar me ekipet e FMN-së më shumë se dy javë dhe kemi dakorduar thellimin e bashkëpunimit para së gjithash në nivel teknik”, deklaroi ministri, duke u përgjigjur në pyetje të gazetarëve gjatë prezantimit të sotëm të Programit për menaxhim me financat publike dhe fillimin e procesit për diskutime publike dhe konsultime me palët e cenueshme.

Në lidhje me rekomandimin për rritjen e kufirit të moshës për pensionim, potencoi se Qeveria absolutisht nuk mendon për rritjen e moshës së pensionimit, por shtoi se konsiderojnë se ka hapësirë që të zbatohen një pjesë e rekomandimeve të tyre, ndërsa mes tyre edhe ajo për rritjen e efikasitetit në shpenzimet publike.

Theksoi se është evidente se Drejtoria për të Ardhura Publike duhet ta forcojë kapacitetin e saj dhe se ka hapësirë të madhe për ngritjen e pagesës së tatimeve./Telegrafi/