‘Telefononi konsullatën’: Momenti kur gazetari i BBC-së që mbulonte protestat masive arrestohet dhe trajtohet në mënyrë agresive nga policia kineze

Ky është momenti kur një gazetar i BBC-së që mbulonte një protestë kundër bllokimit në Kinë arrestohet dhe trajtohet në mënyrë agresive nga policia kineze.

Pamjet vijnë ndërsa protestat masive që bëjnë thirrje për t’i dhënë fund diktaturës së Xi Jinping dhe frenimeve “Zero-Covid” kanë tronditur vendin.

Sipas mediave të huaja, përcjell Telegrafi, pamjet tronditëse të shpërndara në mediat sociale tregojnë Edward Lawrence, një operator kamerash, duke u tërhequr zvarrë nga oficerët e Xi ndërsa ai i bërtet një miku duke i thënë ‘Telefononi konsullatën tani’.

Vetëm disa orë përpara se pamjet të dilnin në internet, Lawrence kishte postuar në Twitter: “Jam në skenën e protestës së jashtëzakonshme kundër masave Covid-zero të natës së kaluar në Shangai. Shumë njerëz janë mbledhur këtu në heshtje duke parë. Shumë policë. Dy vajza vendosën lule të cilat u hoqën menjëherë nga policia. Një burrë kaloi me makinë me gishtin e mesëm drejt policisë”.

https://twitter.com/Shanghaishang10/status/1596875911457959938?s=20&t=UciCBpSSDRQI5U1ZncQOxQ

Ndërkohë një zëdhënës i BBC ka thënë: “BBC është jashtëzakonisht e shqetësuar për trajtimin e gazetarit tonë Ed Lawrence, i cili u arrestua dhe u prangos ndërsa mbulonte protestat në Shangai. Ai u mbajt për disa orë para se të lirohej”.

Kina po përballet me protestat më të mëdha antiqeveritare që nga masakra e Sheshit Tiananmen, pasi aktivistët mbushën rrugët për të bërë thirrje për t’i dhënë fund sundimit të presidentit Xi Jinping dhe Partisë Komuniste Kineze (CCP). /Telegrafi/