Sveçla i reagon Qalajt: Duan të intimitojnë policët hetues, nuk shantazhohemi as nuk zmbrapsemi

Ministri i Brendshëm, Xhelal Sveçla, i ka reaguar deputetit të PDK-së, Rashit Qalaj, pasi ky i fundit ka akuzuar Qeverinë Kurti për ndërhyrje në organet e drejtësisë, në këtë rast në Policinë e Kosovës.

Qalaj pretendon se shkarkimi i drejtorit të Krimeve Ekonomike Musli Salihu, ka ardhur menjëherë pas deklaratës së ministrit Xhelal Sveçla.

“Menjëherë pas deklarimit të ministrit Sveçla se nuk është i kënaqur me një pjesë të prokurorisë së shtetit dhe se do të rishikoj punën e policëve që janë marrë me rastin shkarkohet drejtori i krimeve ekonomike”, tha Qalaj të enjten.

Sveçla duke iu përgjigjur ish-drejtorit të PK-së, ka thënë se duan të intimidojnë policët hetues që kryejnë punët e tyre.

“Mbase po duan të thonë se Departamenti i Hetimeve në Polici, e ato që janë për krimin e organizuar e korrupsionin duhet t’i raportojnë Qalaj ende? A çfarë është porosia e kësaj insinuate të thënë sot në Kuvend? Apo po duan të intimitojnë policët hetues që kryejnë punët e tyre? Padyshim që asnjë qëllim të mirë nuk e ka pasur sot ish Drejtori i policisë, deputeti i PDK-së Rashit Qalaj”, tha ai.

Sipas Sveçlës, takimi i përmendur ka qenë prezantim i të arriturave të Policisë në fushën e luftimit të krimit, në formatin e punëtorisë në objektin që është pronë e MPB-së, duke shtuar se pjesëmarrësit e atij takimi kanë qenë me autorizimin e eprorit të Policisë dhe kabinetit të ministrit.

Lexo po ashtu Qalaj akuzon Qeverinë Kurti për ndërhyrje në Policinë e Kosovës

“Policia e Kosovës është Agjenci Ekzekutive nën ombrellën e Ministrisë së Punëve të Brendshme. Është detyrë e imja që të kërkoj prezantim apo raport mbi të gjitha angazhimet që Policia e Kosovës i ka në mandat dhe të obliguara ligjërisht që t’i zbatoj. Kjo vlenë për të gjitha agjencitë që mbulon Ministria e Punëve të Brendshme”, shtoi ai.

Ministri theksoi se lufta jonë ndaj krimit do të vazhdojë, përkundër sulmeve e përpjekjeve për të minuar këtë proces.

“Ne nuk kemi rrugë tjetër përveç asaj të luftimit të krimit. Dhe ne do ta ndjekim atë rrugë pashmangshëm. Për këdo që ka dilema në këtë, më vjen keq për ta, është proces i pakthyeshëm dhe natyrisht për disa edhe i dhimbshëm”.

“Ne nuk kemi pranuar të shantazhohemi nga asnjë rrethanë, sot më shumë së kurrë as nuk shantazhohemi as nuk zmbrapsemi”, tha në fund Sveçla./Telegrafi/