Sukseset e artisteve shqiptare nuk kanë të ndalur, Ava Max dhe Rita Ora fitojnë çmime të rëndësishme në LOS40 Music Awards

Është mbajtur mbrëmja e madhe vjetore e ndarjes së çmimeve, LOS40 Music Awards 2019, në Madrid të Spanjës.

Evenimenti i cili mirëpriti yje nga e gjitha bota, solli performanca spektakolare për teleshikuesit, e ndërsa dhuroi edhe shumë çmime përgjatë mbrëmjes.

Ashtu siç tashmë është bërë zakon, nuk ka mbrëmje madhështore të ndarjes së çmimeve ku nuk mungojnë shqiptarët.

LOS40 Music Awards 2019 këtë vit kishte nominuar dy artiste shqiptare, Rita Ora dhe Ava Max, të cilat të dyja kanë arritur të dalin triumfuese në kategoritë në të cilat ishin nominuar.

Ava Max, emri i vërtetë i së cilës është Amanda Ava Koçi, ka fituar çmimin “Kënga më e mirë ndërkombëtare”, për këngën e saj shumë të suksesshme “Sweet but Psycho”.

Këngëtarja me prejardhje nga Shqipëria ka lënë prapa konkurrentë të fuqishëm si këngët: “Senorita” nga Camila Cabello dhe Shawn Mendes, “High Hopes” nga Panic! at the Disco, “Sucker” nga Jonas Brothers dhe “I don’t care” nga Ed Sheeran dhe Justin Bieber.

Lexo po ashtu Krenoi shqiptarët me paraqitjen e saj fantastike në MTV EMA, Ava Max: Zemra ime ishte gati të plaste nga dashuria që më dhatë

Ava Max ishte e nominaur gjithashtu për çmimin “Artistja e re më e mirë internacionale e vitit”, por ky çmim shkoi në duart e artistes Mabel.

Ndërkohë, këngëtarja nga Kosova, Rita Ora, ishte gjithashtu e nominuar për dy nga çmimet e kësaj mbrëmje.

Ajo triumfoi në kategorinë “Videoja më e mirë muzikore e vitit”, për këngën “RIP” në bashkëpunim me Sofia Reyes dhe Anitta.

https://www.instagram.com/p/B4n4oxRHklB/

Tri vajzat lanë prapa klipet “Nothing Breaks Like a Heart” nga Mark Ronson dhe Miley Cyrus, “Bad Guy” nga Billie Eilish, “Sucker” nga Jonas Brothers” dhe “Don’t call me up” nga Mabel.

Por Rita Ora u mund në kategorinë tjetër ku ishte nominuar, “Artisti më i mirë ndërkombëtar i vitit”, i cili këtë vit shkoi për Jonas Brothers.

E lumtur për suksesin, këngëtarja Ora ndau me ndjekësit e saj në InstaStory momentin kur Sofia e cila ishte prezente në eveniment, e mori çmimin për “Videon më të mirë muzikore të vitit”.

“Po, Anita dhe Sofia Reyes, unë isha atje në shpirt! Sa krenare të jem pjesë e kësaj kënge magjike”, shkroi këngëtarja e lindur në Prishtinë.

Kujtojmë që po në të njëjtin festival vitin e kaluar, LOS40 Music Awards 2018, artistja tjetër e famshme shqiptare, Dua Lipa kishte fituar tri çmime: “Artistja më e mirë ndërkombëtare”, “Albumi më i mirë ndërkombëtar”, dhe “Kënga më e mirë ndërkombëtare”. /Telegrafi/