Stoltenberg, Zelenskyt: Jemi dakorduar për pakon trepjesëshe që e afron Ukrainën me NATO-n

Presidenti ukrainas Volodymyr Zelensky dhe Sekretari i Përgjithshëm i NATO-s, Jens Stoltenberg janë duke mbajtur një konferencë për media.

Stoltenberg menjëherë në fillimi konfirmoi se Ukraina do të jetë anëtare e NATO-s, transmeton Telegrafi.

“Ne ramë dakord për një paketë trepjesëshe që e afron Ukrainën me NATO-n. Një program i shumëfishtë i ndihmës praktike, krijimi i një këshilli të ri që do të lidhë NATO-n dhe Ukrainën, dhe konfirmimi që Ukraina do të bëhet anëtare e NATO-s”, shtoi ai.

Lexo po ashtu Ia mësynë qytezës në lindje, tanku dhe ushtarët rusë ndalen në gjysmë të rrugës – goditen nga artileria e rojeve kufitare të Ukrainës

Lidhur me anëtarësimin në NATO, Stoltenberg tha se aleanca do t’i bëjë një ftesë “kur aleatët të bien dakord, kur të plotësohen kushtet”.

“Kur të përfundojë lufta, ne duhet të sigurohemi që të ketë marrëveshje të besueshme për sigurinë e Ukrainës, në mënyrë që historia të mos përsëritet”, tha Stoltenberg.

Duke iu kthyer presidentit ukrainas, ai tha: “Sot takohemi si të barabartë, mezi pres ditën kur të takohemi si aleatë”.

Zelensky e filloi fjalimin e tij duke pohuar se aktualisht ka mungesë sigurie në Ukrainë.

Lexo po ashtu Ushtari ukrainas arrin që me Stingerin amerikan t’i shkatërrojë në ajër dy raketa ruse, që për objektiv kishin Kievin

“Falënderoj NATO-n për tre paketat e mbështetjes. Kam diskutuar se çfarë tjetër mund të bëhet për të ndihmuar popullin ukrainas. Kemi lajme pozitive për paketën e re të mbështetjes së mbrojtjes që vjen nga partnerët tanë”, tha presidenti ukrainas.

“Dëshiroj t’ju shpreh mirënjohjen time, Jens”, tha Zelensky duke iu drejtuar kreut të NATO-s.

Megjithatë, ai shtoi se rezultati “optimal” i samitit do të ishte që Ukraina të merrte një ftesë të drejtpërdrejtë për t’u bashkuar me aleancën ushtarake. /Telegrafi/