Starmer: Britania e Madhe nuk ka nevojë të zgjedhë mes SHBA-së dhe BE-së

Kryeministri britanik Keir Starmer ka hedhur poshtë çdo sugjerim që Britania e Madhe duhet të zgjedhë midis lidhjeve më të ngushta me SHBA-në ose Bashkimin Evropian, kur Donald Trump të kthehet në Shtëpinë e Bardhë.

Starmer tha se qeveria e tij “nuk do të largohej kurrë” nga partneriteti i saj me SHBA-në, dhe gjithashtu premtoi të ndërtojë lidhje më të forta me Evropën.

Ai theksoi gjithashtu se bota u përball me “kohë të rrezikshme”, duke thënë se stabiliteti ishte thelbësor për rritjen dhe Britania e Madhe duhet të vazhdojë të mbështesë Ukrainën kundër Rusisë.

Ka kohë që spekulohet se presidenti i zgjedhur i SHBA-së mund të nisë një luftë tregtare kundër Evropës dhe të zvogëlojë mbështetjen për Ukrainën, madje edhe NATO-n.

Në rrethana të tilla, analistët sugjerojnë se Britania do të vihej nën presion për të marrë anë, transmeton Telegrafi.

Muajin e kaluar, një aleat i ngushtë i Donald Trump tha se Britania do të duhet të zgjedhë midis “marrëdhënieve speciale” të SHBA-së dhe Britanisë së Madhe dhe lidhjeve më të ngushta me BE-në – të cilën Trump e përshkruan si një “mini Kinë”.

Stephen Moore i tha BBC-së se nëse Britania e Madhe do të lëvizte “drejt më shumë modelit amerikan të lirisë ekonomike… kjo do të nxiste gatishmërinë e administratës Trump për marrëveshjen e tregtisë së lirë me Britaninë e Madhe”.

Duke reflektuar mbi fjalimin e Keir, David Manning, ish-ambasador i Britanisë në SHBA, tha se kryeministri kishte “qasjen e duhur” por paralajmëroi se nuk do të ishte “e lehtë”.

“Do të jetë një çështje e drejtimit të interesave tona midis dy poleve”, tha ai për programin “Today” të BBC-së.

Por ai theksoi se “nuk ishte mirë të pretendosh të shohësh sy për sy” për çështje të tilla si Ukraina dhe Lindja e Mesme, duke thënë se Britania  do të duhet t’i përgjigjet asaj që imponon Trump. /Telegrafi/