Slavia Pragë – Ballkani: Vlera e dy skuadrave, futbollistët më të vlefshëm dhe arritjet më të mëdha

Ballkani do të zhvilloj sonte ndeshjen e dytë në Ligën e Konferencës.

Kampioni në fuqi i Kosovës ka marrë rrugë drejt Republikës Çeke ku do të përballet me Slavia Pragën në kuadër të xhiros së dytë në Grupin G.

Suharekasit e nisën me barazim ndaj CFR Cluj, derisa synojnë të marrin rezultat pozitivë edhe në Pragë.

View this post on Instagram

A post shared by Telegrafi Sport (@telegrafisport)

Dueli mes Slavia Pragës dhe Ballkanit zhvillohet në stadiumin Fortuna Arena dhe fillon nga ora 18:45.

Kujtojmë që pas ndeshjeve të xhiros së parë, Grupi G është i balancuar me katër skuadrat si Ballkani, Slavia Pragë, CFR Cluj e Sivaspor që kanë nga një pikë.

Vlera e skuadrave

Dallimi në vlerën e dy skuadrave në faqen e specializuar për vlerësimin e futbollistëve ‘Transfermarkt’ është shumë i madh.

Kampioni në fuqi i Kosovës ka një vlerë totale prej 4,18 milionë euro nga me 27 futbollistë në total.

Ndërkohë vlera e ekipit çek është 13 herë më e lartë se sa ajo e ekipit kosovar.

Slavia Praga ka në radhët e veta 28 futbollistë që kanë vlerë të përbashkët prej 53,milionë eurove.

Futbollistët më të shtrenjtë nga të dyja skuadrat

Ballkani është një skuadër me buxhet shumë herë më të vogël se Cluj dhe natyrisht edhe futbollistët e kampionit kosovar kanë vlerë më të vogël në tregun e transferimeve.

Sulmuesi anësorë, Ermal Krasniqi është futbollisti me vlerën më të madhe te Ballkani me 350 mijë euro.

Ndërkohë pas tij vijnë dy kapitenët Edvin Kuc dhe Armend Thaqi që kanë një vlerë prej 300 mijë eurove.

Në pozitat katër dhe pesë si futbollistët më të vlefshëm tek kampioni kosovar janë Rrustem Hoxha dhe Nazmi Gripshi që kartoni i tyre vlerësohet 275 mijë euro.

Në anën tjetër te kampioni në fuqi i Republikës Çeke futbollistët më të vlefshëm janë nga reparti i mesfushës.

Mesfushori qendror Thomas Holes është futbollisti me vlerën më të madhe te vendasit pasi vlerësohet shtatë milionë euro.

Ndërkohë në vendin e dytë ndodhet Peter Olayinka me 6,5 milionë euro, ku nigeriani më parë ka bërë edhe karrierë në Shqipëri te Bylis e Skënderbeu.

I treti në listë si futbollisti më i vlefshëm te kryeqytetasit çek është Lukas Provos me 4,5 milionë euro, derisa në pozitat katër dhe pesë janë Lukas Masopust e Ondrej Lingr me 3,5 milionë euro vlerë.

Trofetë dhe arritjet më të mëdha të dy klubeve

Ballkani nuk është njohur si skuadër që fiton trofe në futbollin kosovar. Në fakt trofeu i parë në Suharekë shkoi këtë vit, ku ekipi i udhëhequr nga trajneri Ilir Daja fitoi titullin e kampionit.

Pra në histori të klubit, Ballkani ka vetëm një titull të kampionit, por ka një sukses që nuk e ka arritur asnjë klub nga Kosova.

Suksesi më i madh i suharekasve është padyshim arritja në grupe të një gare evropiane, gjë që nuk e ka bërë më parë asnjë skuadër e vendit tonë.

Dallim të madh ka në aspektin e trofeve kampioni në fuqi i Republikës Çeke, Slavia Praga.

Slavia Praga ka të fituar shtatë herë titullin e kampionit në Çeki dhe gjashtë herë të tjera Kupën e shtetit.

Ndërkohë vlend të përmendet se Slavia Pragës kishte fituar 14 herë titullin e kampionit dhe katër herë Kupën në Çekosllovaki sa ishin së bashku këto dy shtete. /Telegrafi/