Presidenti i SHBA-së, Donald Trump, ka qenë gjithmonë i lidhur ngushtë me sportin dhe ngjarjet sportive, por pak kush e di që ai humbi miliarda dollarë për shkak të një vendimi të gabuar investimi në fillim të viteve 1980.
Në atë periudhë, Trump refuzoi mundësinë për të blerë disa klube në NFL, ligën më të fuqishme të futbollit amerikan, dhe në vend të kësaj zgjodhi të investonte në ligën rivale, USFL.
Ai bleu shumicën e aksioneve të ekipit New Jersey Generals, duke besuar se USFL do të rivalizonte NFL-në dhe do të kishte të ardhme më të ndritur.
Trump u përpoq të forconte ligën duke bindur trajnerë dhe lojtarë të NFL-së që t’i bashkoheshin USFL-së dhe madje i ofroi yllit Lawrence Taylor një kredi prej një milion dollarësh për ta transferuar.
Ai gjithashtu nxiti idenë e një bashkimi midis dy ligave, në mënyrë që USFL të përfitonte drejtpërdrejt nga fama e NFL-së.
Në atë kohë, Trump pati mundësinë të blinte Dallas Cowboys për vetëm 50 milionë dollarë, por ai e refuzoi këtë ofertë duke besuar se klubi nuk kishte potencial dhe se USFL do të ishte investimi më i mençur.
Megjithatë, historia dëshmoi të kundërtën: USFL u shpërbë në vitin 1986, ndërsa Dallas Cowboys sot ka një vlerë mbi 10 miliardë dollarë dhe NFL vazhdon të jetë një nga ligat më të fuqishme në botë.
Vendimi i gabuar i Trump rezultoi në humbje të mëdha financiare dhe një nga rastet më të njohura kur një investim i gabuar në sport i kushtoi miliarda. /Telegrafi/
