Si 10-vjeçar ishte 182 centimetra i gjatë, e në shkollë të mesme arriti në 213 – historia e pakistanezit që sot është afër dy metra e gjysmë

Pavarësisht faktit se prindërit e tij kanë një gjatësi “normale” të trupit, Mudassiri 21-vjeç, ishte 182 centimetra i gjatë kur ishte vetëm 10-vjeçar, e 213 centimetra derisa ishte nxënës i shkollës së mesme.

Prindërit e tij në fillim ishin të gëzuar që djali i tyre ishte më i gjatë se cilido nxënës tjetër në klasë që ai e kishte, por filluan të brengosen kur arriti gjatësinë prej 182 centimetra.

Mudassir nga Lahore e Pakistanit, thotë se ishte fëmia më i gjatë në shkollë por edhe në lagjen ku është rritur.

“Kam qenë 1.8 metra si 10-vjeçar, kurse në shkollë të mesme arrita në 2.1 metra. Prindërit e mi filluan të brengosen duke parë se unë çdo ditë e më shumë po rritesha. Nuk e dinin se pse po rritesha më shumë se vëllezërit dhe motrat e mia”, ka deklaruar Mudassiri.

Prindërit e dërguan për kontrolle mjekësorë në Lahore dhe Karachi gjatë vitit 2017, ku u thanë se biri i tyre ka një çrregullim hormonal që e bëjnë atë shumë më të gjatë sesa bashkëmoshatarët e tij.

“Herën e fundit kur jam matur ka qenë para një vit e gjysmë dhe isha 246 centimetra”, ka shtuar ai.

Për fat të keq ai ishte prekur mjaft nga bulizmi, pasi bashkëmoshatarët talleshin me gjatësinë e tij.

“Fëmijëria ime ishte normale, por vazhdimisht ngacmohesha nga fëmijët në shkollë. Më quanin me emra të ndryshëm. Kisha problem të ulem në bankat shkollore, në autobus”, ka shtuar Mudassir.

Gjatësia e ka detyruar të vozit motoçikletë sepse nuk mund të futet në një veturë. Numrin e këpucëve e ka 60, kurse pantallonat duhet t’i qep të rrobaqepësi, sepse nëpër lokale nuk mund të gjen që i përshtaten.

Megjithatë ekziston edhe ana pozitive e këtij rrëfimi, ai është regjistruar në një klub lokal të kriketit dhe shpreson të jetë në reprezentacionin e Pakistanit.

Falë gjatësisë arrin i pari në cak për shkak të këmbëve të gjata, ndërsa gjuajtjet i ka të ngjashme me ato të “topave” që dikur përdoreshin nëpër luftëra. /Telegrafi/