ShFMU “Shaban Idrizi” në Zhabar të Mitrovicës në kushte të rënda, komuna thotë se janë planifikuar 30 mijë euro për investime

Arsimi është një ndër hallkat kryesore të shoqërisë, derisa institucionet arsimore duhet të ofrojnë kushte adekuate dhe një ambient cilësor për të gjithë nxënësit.

Por, në qytetin e Mitrovicës ka raste të shkollave që kanë probleme duke filluar nga çatia, dritaret e deri tek banjot, shkruan Telegrafi.

Një rast i tillë është shkolla fillore e mesme e ulët “Shaban Idrizi” në Zhabar të Mitrovicës.

Kjo shkollë është në gjendje të rëndë, duke filluar nga çatia e saj që pikon sa herë të bie shi deri tek banjot që kundërmojnë erë të rëndë.

Lidhur me këtë, Arta Sadiku nga Këshilli i Prindërve, në një prononcim për Telegrafin ka thënë se kushtet në këtë shkollë janë të rënda, derisa tregon se kur bie shi çatia e shkollës çdoherë pikon.

“Gati të gjithë xhamat lëkunden, nuk e di se si nxënësit po guxojnë të mbajnë mësim, dyert janë komplet të shkatërruara. Mësuesit dhe drejtoresha janë shumë të mirë, por nuk po ka ndihmë nga askush”, ka thënë Sadiku.

Ajo ka thënë se edhe bankat e karriget janë në “kushte të mjerueshme”, por potencon se problemi kryesor është se banjot kundërmojnë erë shumë të rëndë.

Sadiku ka treguar se gjithherë kërkesa kryesore si Këshill i Prindërve drejtuar komunës ishte rregullimi i çështjes së banjove.

“Gjithmonë pika kryesore ka qenë banjot të rregullohen, kanë erë katastrofale, nuk e di se si fëmijët nuk po marrin ndonjë infeksion”, ka shtuar ajo.

Tutje ajo ka bërë të ditur se gjatë dimrit është shumë ftohtë në ambientet brenda shkollës, e gjithë kjo sipas saj, si mungesë e izolimit të duhur.

Ndërsa një prind në kushte anonimiteti për Telegrafin ka pohuar se gjendja në këtë shkollë është shumë e rëndë.

Ndërsa për erën e rëndë që kundërmon në banjo ka thënë se ka frikë që fëmijët do të preken nga ndonjë infeksion.

“Era e banjove është shumë e rëndë, kam frikë se fëmijët do të preken nga ndonjë infeksion”, ka thënë prindi.

Për këtë çështje, Komuna e Mitrovicës në një përgjigje për Telegrafin ka thënë se procedura e prokurimit për investim në këtë shkollë, në shumën prej 30 mijë euro, është në përfundim të prokurimit dhe nënshkrimit të kontratës.

Në përgjigjen e komunës bëhet e ditur se tualetet nuk janë të përfshira në këtë investim, transmeton Telegrafi.

Por, sipas komunës kjo shkollë do të renovohet në tërësi atëherë kur aplikojnë në Fondin e Kosovës për Efiçiencë të Energjisë.

“ShFMU ‘Shaban Idrizi’ do të renovohet në tërësi në vitet pasuese sepse kemi planifikuar të aplikojmë në Fondin e Kosovës për Efiçiencë të Energjisë, jemi në pritje të shpalljes së ardhshme publike dhe presim të kemi sukses në arritjen e marrëveshjes”, thuhet tutje në përgjigje.

Sipas tyre, në të kundërtën vitin e ardhshëm do të planifikohet projekt konkret për investime në banjot dhe nyjet sanitare të kësaj shkolle. /Telegrafi/