Shefi i zyrës së BE-së në Kosovë takon kryesuesin e Këshillit Prokurorial të Kosovës

Një ditë pasi e ka kritikuar Këshillin Prokurorial të Kosovës, lidhur me përzgjedhjen e Kryeprokurorit të Shtetit, Shefi i Zyrës së Bashkimit Evropian në Kosovë, Tomas Szunyog, ka takuar sot kryesuesin e këtij këshilli, Jetish Malokun.

Shefi I Zyrës së Be-së, përmes një postimi në Twitter, ka thënë se gjatë takimit me Malokun kanë diskutuar lidhur me performancën e sistemit prokurorial dhe se janë dakorduar që të intensifikojnë bashkëpunimin në mes institucioneve.

“Pas seancës së djeshme të Këshillit Prokurorial të Kosovës, sot jam takuar me kryesuesin e KPK-së, z. Jetish Maloku, për të diskutuar mbi përformancën e sistemit prokurorial. Ne ramë dakord të intensifikojmë bashkëpunimin tonë që synon të japë drejtësi për njerëzit e Kosovës në mënyrë efikase dhe të paanshme”, ka shkruar Szunyog, transmeton Telegrafi.

Following yesterday's session of the Kosovo Prosecutorial Council, today I met with the KPC Chair, Mr Jetish Maloku, to discuss the performance of the prosecutorial system.
We agreed to intensify our co-op aimed at delivering justice to the people of 🇽🇰efficiently & impartially.

— Ambassador Tomáš Szunyog (@EUAmbKS) April 7, 2022

Këshilli Prokurorial i Kosovës të mërkurën në mënyrë unanime ka votuar Blerim Isufajn për Kryeprokuror të ri të Shtetit.

Ndryshe, shefi i BE-së në Kosovë të mërkurën është shpreh i zhgënjyer dhe i habitur për procesin e përzgjedhjes së Kryeprokurorit të Shtetit nga Këshilli Prokurorial i Kosovës.

Ai ka thënë se BE-ja në vazhdimësi ka thirrur për një proces të drejtë dhe meritor, e që sipas tij KPK i ka shpërfillur këto parime.

Lidhur me këtë votim të KPK-së, janë shprehur të pakënaqur edhe ambasadori gjerman, Jorn Rohde, ambasadori amerikan, Jeff Hovenier si dhe OJQ-të në Kosovë.

Të mërkurën tri organizata të shoqërisë civile i kanë kërkuar presidentes të mos e dekretojë Isufajn për kryeprokuror të vendit.

Konkursi për emërimin e Kryeprokurorit të ri të Shtetit ishte shpallur nga Këshilli Prokurorial i Kosovës më 12 janar 2022, kjo pasi Aleksandër Lumezit, i cili aktualisht ushtron këtë pozitë, i përfundon mandati më 21 prill 2022. /Telegrafi/