SHBA kërkon që Ukraina të mbajë zgjedhje këtë vit, njofton i dërguari special i Trumpit

Shtetet e Bashkuara duan që Ukraina të mbajë zgjedhje, potencialisht deri në fund të vitit, veçanërisht nëse Kievi mund të bie dakord për një armëpushim me Rusinë në muajt e ardhshëm, ka njoftuar zyrtari më i lartë i Donald Trumpit për Ukrainën.

Keith Kellogg, i dërguari special i Trumpit për Ukrainën dhe Rusinë, tha në një intervistë se zgjedhjet presidenciale dhe parlamentare të Ukrainës, të pezulluara gjatë luftës me Rusinë, “duhen bërë”.

“Shumica e kombeve demokratike kanë zgjedhje në luftë. Mendoj se është e rëndësishme që ta bëjnë këtë”, tha Kellogg.

“Unë mendoj se është mirë për demokracinë. Kjo është bukuria e një demokracie solide, ju keni më shumë se një person potencialisht të kandidojë”, shtoi ai.

Bëhet e ditur se Trump dhe Kellogg kanë thënë të dy se janë duke punuar në një plan për të ndërmjetësuar një marrëveshje në muajt e parë të administratës së re për t’i dhënë fund luftës që shpërtheu me agresionin rus në shkurt 2022.

Ata kanë ofruar pak detaje rreth strategjisë së tyre për t’i dhënë fund konfliktit më vdekjeprurës në Evropë që nga Lufta e Dytë Botërore, e as kur mund të zbulojnë një plan të tillë.

Plani i Trumpit është ende në zhvillim dhe nuk është marrë asnjë vendim politik, por Kellogg dhe zyrtarë të tjerë të Shtëpisë së Bardhë kanë diskutuar ditët e fundit duke e shtyrë Ukrainën të bie dakord për zgjedhjet si pjesë e një armëpushimi fillestar me Rusinë.

Zyrtarët e Trumpit po debatojnë gjithashtu nëse duhet të shtyjnë për një armëpushim fillestar përpara se të përpiqen të ndërmjetësojnë një marrëveshje më të përhershme, shkruan Reuters, përcjell Telegrafi.

E nëse zgjedhjet presidenciale do të mbaheshin në Ukrainë, fituesi mund të jetë përgjegjës për negocimin e një pakti afatgjatë me Moskën.

Por, është e paqartë se si do të përshëndetet një propozim i tillë i Trumpit në Kiev.

Ndërkohë, presidenti ukrainas, Volodymyr Zelensky ka thënë se Ukraina mund të mbajë zgjedhje këtë vit nëse luftimet përfundojnë dhe ekzistojnë garanci të forta sigurie për të penguar Rusinë nga rinovimi i armiqësive.

Ndryshe, mandati pesëvjeçar i Zelenskyt duhej të përfundonte në vitin 2024, por zgjedhjet presidenciale dhe parlamentare nuk mund të mbahen sipas ligjit ushtarak, të cilin Ukraina e vendosi në shkurt të vitit 2022.

Sipas presidentit rus, Vladimir Putin, Zelensky nuk është një udhëheqës legjitim në mungesë të një mandati të rinovuar elektoral dhe se presidenti ukrainas nuk ka të drejtën ligjore për të nënshkruar dokumente detyruese në lidhje me një marrëveshje të mundshme paqeje.

Sipas liderit rus, megjithatë, Zelensky mund të marrë pjesë në negociata ndërkohë, por së pari duhet të revokojë një dekret të vitit 2022 që ai nënshkroi për ndalimin e bisedimeve me Rusinë për sa kohë që Putini është në krye.

Legjislacioni ukrainas në mënyrë eksplicite ndalon mbajtjen e zgjedhjeve presidenciale dhe parlamentare nën ligjin ushtarak. /Telegrafi/