Shala: Presidentja duhet ta kthejë në binarë procesin e zgjedhjes së Kryeprokuror të Shtetit

Gzim Shala nga Instituti i Kosovës për Drejtësi (IKD) ka thënë se nëse Këshilli Prokurorial i Kosovës (KPK), nuk i merr parasysh rekomandimet për kthimin e procesit në zero për zgjedhjen e Kryeprokurorit të Shtetit,  dhe kandidati që shkon për dekretim të presidentja, atëherë kësaj të fundit i bie topi për ta kthyer këtë proces në binarë. 

“Kushtetuta dhe ligjet në fuqi nuk i japin shumë rol Presidentes sa i përket vlerësimit të propozimeve të Këshillit Prokurorial të Kosovës, mirëpo sa i përket kësaj natyre kur kemi të bëjmë edhe me shkelje procedurale, me shkelje të mëdha, më çështje të tjera që lidhen me vetë Sistemin Prokurorial, nuk mund të themi se kemi një situate të zakonshme ku bëhet fjalë për shembull me emërimin e Kryeprokuroreve,  prokuroreve, gjyqtareve etj”, ka thënë ai, për “Betimi për Drejtësi” .

Lexo po ashtu Përfundon intervistimi i kandidatëve për Kryeprokuror të Shtetit, Blerim Isufaj merr 98 pikë nga 100 të mundshme

Shala ka thënë se presidentja duhet të sigurojë që ky proces të jetë meritor sipas Kushtetutës e ligjit.

“…nëse eventualisht Këshilli Prokurorial nuk i merr rekomandimet dhe nuk e anulon procesin atëherë topi i përgjegjësisë bie të Presidentja e cila duhet të sigurojë që ky proces ka qenë meritor dhe ka ka qenë ashtu siç e përcakton kushtetuta dhe ligji”, ka thënë Shala

Ndryshe, koalicioni i Organizatave Joqeveritare, Instituti i Kosovës për Drejtësi (IKD), Grupi për Studime Juridike dhe Politike (GLPS) dhe Lëvizja FOL , ky koalicion ka rekomanduar të anulohet procesi i përzgjedhjes së Kryeprokurorit të Shtetit dhe të shpallet konkurs i ri.