Sateliti i NASA-s ka fotografuar pamje të vullkanit nënujor te “shtëpia e peshkaqenëve” në thellësitë e Oqeanit Paqësor

Një satelit i NASA-s ka kapur momentin kur një vullkan masiv nënujor shpërtheu në thellësitë e Oqeanit Paqësor.

Ky vullkan i veçantë – vullkani Kavachi – është i njohur për shkencëtarët pas një studimi oqeanik që u zhvillua atje në vitin 2015, shkruajnë mediat e huaja, përcjell Telegrafi.

Studiuesit zbuluan se peshqit dhe peshkaqenët banojnë në ujërat acidike të mbinxehura të mbushura me squfur rreth vullkanit.

Uji përmban fragmente gurësh vullkanikë dhe besohet se peshkaqenët mund të kenë pësuar mutacion në të vërtetë për t’i ndihmuar ata të përballen me kushtet ekstreme.

Në vitet që pasuan, shkencëtarët kanë hulumtuar krijesat që jetojnë përreth dhe brenda vullkanit masiv, baza e të cilit shtrihet 1.2 kilometra deri në fundin e oqeanit.

Madje Kavachi-t i është vënë edhe pseudonimi ‘Sharkcano’ për shkak të peshkaqenëve që jetojnë në kushtet e tij të vështira.

Shpërthimi i fundit u kap nga NASA duke përdorur Operacional Land Imager – një teleskop i fuqishëm skanues në bordin e satelitit Landsat 8 në orbitë.

Sipas agjencisë hapësinore, aktiviteti i fundit zgjati disa ditë midis prillit dhe majit 2022.

“Para këtij aktiviteti të fundit, shpërthime të mëdha u vëzhguan në Kavachi në 2014 dhe 2007”, shpjegoi NASA në një deklaratë.

Vullkani shpërthen pothuajse vazhdimisht dhe banorët e ishujve të banuar aty pranë shpesh raportojnë avull dhe hi të dukshëm. /Telegrafi/