Samiti i Parisit refuzon “lehtësimin e sanksioneve ndaj Rusisë” – harton planet për një forcë “siguruese” në Ukrainë

Vendet evropiane ranë dakord në një samit në Paris të enjten që të rrisin në vend se të heqin sanksionet ndaj Rusisë për luftën e saj kundër Ukrainës, pasi Britania dhe Franca filluan të hartojnë planet për të dërguar një forcë “siguruese” pas çdo marrëveshjeje paqe në Ukrainë.

Presidenti Emmanuel Macron priti takimin e aleatëve evropianë të Ukrainës dhe presidentit Volodymyr Zelensky në përpjekjen e fundit për të rënë dakord për një politikë të koordinuar pasi Donald Trump tronditi Evropën duke hapur bisedime të drejtpërdrejta me Kremlinin.

SHBA pretendon përparim të mundshëm drejt një armëpushimi për t’i dhënë fund konfliktit tre-vjeçar të shkaktuar nga pushtimi i plotë i Rusisë në shkurt të vitit 2022 ndaj fqinjit të saj.

Por ende një marrëveshje paqeje duket larg.

Takimi i mbi dy duzina krerëve të shteteve dhe qeverive u përcaktua për të rënë dakord se cilat garanci sigurie mund t’i ofrojë Evropa Ukrainës pasi të ketë një marrëveshje për një armëpushim, duke përfshirë vendosjen e mundshme të forcave ushtarake nga një i ashtuquajtur “koalicion i të gatshëmve”.

“Evropa mund të mbrohet. Ne duhet ta vërtetojmë këtë”, tha Zelensky në mediat sociale përpara bisedimeve.

Lexo po ashtu Zelensky: Numri i trupave ndërkombëtare në Ukrainë do të varet nga mbështetja e SHBA

Sipas mediave, u duk se kishte konsensus rreth tryezës në Pallatin Elysee se sanksionet e vendosura kundër Rusisë “nuk duhet të dobësohen”, dhe përkundrazi të intensifikohen, derisa të ketë paqe.

“Kishte qartësi të plotë se tani nuk është koha për heqjen e sanksioneve, përkundrazi – ajo që diskutuam është se si mund të rrisim sanksionet për të mbështetur iniciativën e SHBA për ta sjellë Rusinë në tryezë nga presioni i mëtejshëm”, tha kryeministri britanik Keir Starmer së bashku me Zelensky.

E Zelensky shtoi se “të gjithë e kuptojnë se sot Rusia nuk dëshiron asnjë lloj paqeje”.

Në një konferencë të veçantë, kancelari gjerman Olaf Scholz theksoi se heqja e sanksioneve kundër Rusisë do të ishte një “gabim i rëndë” dhe “nuk ka kuptim” pa një armëpushim.

Përveç rritjes së forcave të armatosura të Ukrainës, një shtyllë kyçe e garantimit të sigurisë dhe parandalimit të pushtimeve të mëtejshme ruse mund të jetë vendosja e trupave evropiane në Ukrainë, megjithëse deri më tani nuk ka qenë aspak e qartë se si mund të ndodhte kjo.

Macron theksoi se anëtarët e një force të tillë nuk do të ishin paqeruajtës, të dislokuar në vijën e frontit apo ndonjë zëvendësues për ushtrinë ukrainase.

Gjithashtu, tha ai, jo të gjithë aleatët evropianë të Ukrainës do të përfaqësoheshin në forcë, me disa shtete që nuk “kanë kapacitetin” dhe disa ngurrues për shkak të “konteksit politik”. /Telegrafi/