Rritja e çmimeve e papërballueshme, Kaçaniku: Qeveritë nuk ia njohin vlerën konsumatorëve, të gjithë jemi taksapagues

Çmimet e larta të produkteve ushqimore, duke filluar nga ato bazike po ua rëndojnë jetën qytetarëve dhe në fakt rritja e vazhdueshme e tyre po konsiderohet si e papërballueshme për xhepin e qytetarëve.

Kështu ka vlerësuar kryetari i Shoqatës “Konsumatori”, Selatin Kaçaniku, i cili gjatë një intervistë për Telegrafin ka thënë se krahas rritjes së vazhdueshme të çmimeve të produkteve po përballen edhe me injorim nga ana e institucioneve përgjegjëse.

“Dëmi është i madh, i pa imagjinueshëm dhe me këto standarde që i kemi është i pallogaritshëm. Kjo pamundësia për më llogarit, Qeverisë i shërben si arsyetim që nuk do dhe nuk mund të bëjë më shumë. E vërteta është që kjo Qeveri nuk do të bëjë më shumë, pra nuk e njohin qytetarin konsumator, me gjitha të drejtat që ka, nuk ja njohin vlerën, të gjithë jemi taksapagues, jemi gjenerues kryesor të buxhetit prej nga financohet, Qeveria Kuvendi, pra financojmë shtetin”, është shprehur ai.

Kaçaniku bëri të ditur se shoqata që ai drejton ka ngrirë aktivitetet që një vit, si shenjë proteste ndaj veprimeve të Qeverisë.

“Nuk kemi komunikim me Qeverinë, asnjë Qeveri nuk e ka njohur qytetarin konsumator. Nga 15 marsi i vitit 2022, organizata në shenjë proteste i ka ngrirë aktivitetet dhe po presim se si do të reagojnë. Qeveritë qëllimisht nuk e duan qytetarin konsumator partner, por e duan për ta skllavëruar, për ta shtypur,”, theksoi ai.

Gjatë intervistës, ai foli edhe për dallimet në çmime mes qyteteve.

“Dallime duhet të ketë nëse mbështetemi në arsyetime, se kemi treg të lirë. Konkurrenca e cakton ku janë shërbimet më të larta, diku kërkesa është më e madhe, ajo ndikon edhe në çmime. Po të kishim ne treg, siç pretendon Qeveria çmimet do të ishin më stabile. Kjo dëshmon se tregu nuk funksion”, pohoi ai.

I pyetur se a pritet të ketë normalizim të çmimeve, Kaçaniku thotë se “çmimet janë si orteku i borës kur nisin nuk dinë të ndalën”.

Për rritjen e çmimeve, qytetarët janë duke u ankuar vazhdimisht duke thënë se me pagat e tyre nuk po arrijnë të mbulojnë shpenzimet. /Telegrafi/