Rriten pagat për stafin mjekësor në Maqedoni për pesë për qind (Video)

Ministria e Shëndetësisë në Maqedoni dhe Sindikata e Pavarur për Shëndetësi sot kanë nënshkruar marrëveshje për rritje të pagave të stafit mjekësor për 5 për qind.

Në aktin e nënshkrimit të marrëveshjes morën pjesë kryeministri i Maqedonisë, Zoran Zaev, ministri i Shëndetësisë Venko Filipçe dhe përfaqësues nga Sindikata e Pavarur për Shëndetësi.

Kryeministri Zoran Zaev në fjalimin e tij tha se prioritet i lartë i qeverisë është që të sigurojë kushte më të mira për stafin mjekësor në vend, njofton Telegrafi Maqedoni.

“Si ekonomist jam i lumtur kur njoftoj se dikuj i jap para. Ministria e Shëndetësisë dhe Sindikata e Pavarur e Shëndetësisë kanë nënshkruar marrëveshje për rritje të pagave për stafin mjekësor për 5 për qind. Duhet të sigurojmë kushte që mjekët të qëndrojnë në vendin tonë dhe kjo për ne si qeveri është prioritet i lartë. Dua t’i kujtojë mjekët dhe qytetarët se po punojmë që të krijojmë shëndetësi me standardet më të larta. Në këtë rrugë nuk jemi vetëm, Maqedonia po merr mbështetje nga shtetet evropiane”, tha mes tjerash Zaev.

Ai gjithashtu shtoi se pas anëtarësimit në BE, Maqedonia do të ketë më shumë spitale, më shumë ilaçe, kushte më të mira dhe pas këtyre edhe pacientë më të kënaqur.

Ndërsa ministri i Shëndetësisë Venko Filipçe, tha se së bashku me qeverinë po angazhohet maksimalisht që të krijojë kushte më të mira dhe sistem adekuat për sistemin shëndetësor. Ai shtoi se do të vazhdojnë të motivojnë mjekët në vend që punën e tyre ta bëjnë sa më mirë./Telegrafi/