Roma e mposht dhe e ‘rrëzon’ Pescaran nga kategoria (Video)

Roma ka fituar në udhëtim te Pescara me rezultat të thellë 4-1.

Skuadra e Luciano Spallettit ka arritur t’i kthehet fitoreve në Serie A pas barazimit të fundit në shtëpi ndaj Atalantas me rezultat 1-1 duke mposhtur Pescaran në udhëtim.

Pjesa e parë e takimit i takoi në përgjithësi mysafirëve nga Roma që rrezikuan disa herë dhe goditën edhe shtyllën, por u desh të presim minutat e fundit për të parë golin e parë në ndeshje.

Luhej minuta e 44 e ndeshjes kur Stephan El Shaarawy jep një asistim të mirë për Kevin Strootman, i cili shënon nga afërsia për 1-0, ndërsa vetëm një minutë më vonë Roma shënon edhe një herë me anë të Radja Nainggolan dhe skuadrat shkojnë në pushim me rezultatin 2-0.

Në pjesën e dytë u luajt po ashtu ndeshje e njëjtë me Romën dominuese, ku arriti të gjej golin e tretë pas vetëm tre minutash me anë të Mohamed Salah, i cili shënoi një supergol nga rreth 20 metra.

Salah shënoi edhe golin e dytë personal në minutën e 60, ku përsëri asistues ishte El Shaarawy duke mundësuar epërsinë prej 4-0 ndaj Pescaras.

Deri në fund të ndeshjes pati edhe shumë raste tjera për gol, por vetëm vendasit arritën ta gjejnë golin e ngushëllimit me anë të Ahmad Benalit që shënoi nga afërsia në minutën e 83 pas asistimit perfekt të mesfushorit të kombëtares shqiptare, Ledian Memushaj dhe kështu u vulos rezultati përfundimtar 4-1.

Pas kësaj fitore, Roma gjendet në vendin e dytë me 75 pikë apo tetë më pak se Juventusi në vend të parë, ndërsa Pescara edhe matematikisht humb mundësinë për të qëndruar edhe një vit në Serie A. /Telegrafi/

https://www.dailymotion.com/video/x5jjcz5_sport

http://www.dailymotion.com/video/x5jjfl5_mohamed-salah-2nd-goal-hd-pescara-0-4-as-roma-24-04-2017-hd_sport