Refuzoi të harmonizojë Rregulloren për lejet e ndërtimit, ushtrohet padi ndaj Komunës së Graçanicës

Komuna e Graçanicës ka shpërfillur kërkesat nga institucionet për harmonizimin e Rregullores Nr.03/18/KG të datës 26.09.2018, për lejet e ndërtimit, pasi që është konstatuar që rregullorja në fjalë është në kundërshtim me dispozitat e legjislacionit në fuqi.

Si rrejodhjë e miratimit të kësaj Rregullore në vitin 2018, banorët shqiptarë në Graçanicë kanë shprehur shqetësimin e tyre për diskriminim që po u bëhet sa i përket marrjes së lejeve për ndërtim.

Lidhur me këtë, Telegrafi tash e sa javë ka raportuar për ecurinë e kësaj ngjarje. Javën që lamë pas, Ministria e Administrimit dhe Pushtetit Lokal bëri të ditur se ka kërkuar nga Komuna e Graçanicës që t’i ndërmerr veprimet e nevojshme sipas kërkesës së MMPHI-së për të harmonizuar me legjislacionin në fuqi Rregulloren në fjalë, në afat prej 30 ditësh.

Tutje MAPL i tha Telegrafit se e ka proceduar lëndën në Ministrinë e Drejtësisë.

“Edhe për kundër që Kuvendi i Komunës së  Graçanicës, në mbledhjen e datës: 17.05.2024, e ka pas pikë të rendit të ditës, rishqyrtimin e Rregullores Nr.03/18/KG, të datës 26.09.2018, sipas kërkesës së MMPHI-së, Kuvendi i Komunës se Graçanicës, nuk ka rishqyrtuar dhe harmonizuar aktin në fjalë.

Duke pasur në konsideratë se Kuvendi i Komunës së Graçanicës, ka refuzuar të rishqyrtoj dhe harmonizojë Rregulloren Nr.03/18/KG, sipas kërkesës së MMPHI-së, atëherë MAPL përmes shkresës 463-1099/19, ka proceduar lëndën në Ministrinë e Drejtësisë, e cila është kompetente të dërgoj lëndën në gjykatën kompetente, siç përcaktohet me nenin 82.4, të Ligjit Nr. 03/L-040 për Vetëqeverisjen Lokale”, thuhej në përgjigjen e MAPL-së.

E nga Ministria e Drejtësisë kanë bërë të ditur për Telegrafin se më 4 qershor 2024, Avokatura Shtetërore ka ushtuar padi ndaj Komunës së Graçanciës, për të shfuqizuar këtë rregullore.

“Avokatura Shtetërore më datë 29.05.2024 nga MAPL ka pranuar shkresë për inicimin e procedurës gjyqësore bazuar në raportin e vlerësimit të ligjshmërisë së Rregullores Nr.03/18/KG mbi Kushtet e Përgjithshme për Parcelim, Rregullat dhe Procedurën e Ndërtimit të Objekteve në Lëshimin e Kushteve Ndërtimore për Ndërtesat nën Kompetencën e Komunës.

Avokatura Shtetërore më datë 04.06.20245 ka ushtruar padi për shfuqizimin e kësaj rregullore në Gjykatën Themelore në Prishtinë –  Departamenti për Çështje Administrative”, thuhet në përgjigjen e Ministrisë së Drejtësisë.

Telegrafi i ka dërguar pyetje edhe zyrtarëve të Komunës së Graçanicës por të njëjtit tash e një javë nuk janë përgjigjur kërkesave tona. /Telegrafi/