Reagimi i Thaçit pasi trupi gjykues lexoi deklarata të tij dhe të Selimit ku e bënte përgjegjës Sokol Bashotën për komunikatat e UÇK-së

Kur Sokol Bashota u përball me deklaratat e Hashim Thaçit dhe Rexhep Selimit, ku ata e kishin përmendur dëshmitarin si përgjegjës për komunikatat e UÇK-së për një periudhë kohore, i akuzuari Thaçi ngriti dorën duke kërkuar që të konsultohet me mbrojtjen e tij.

Pas konsultimit, mbrojtja e Thaçit e përfaqësuar nga avokati Luka Mishetiq, gjyqtarit iu kërkua që të lexohej i gjithë transkripti ku tregohej që Thaçi kishte përmendur fjalën ‘supozojë’.

Sipas gjyqtarit Mettraux, Rexhep Selimi për ZPS-në  në 2019-ën kishte thënë që me komunikatat deri në 97-ën ishte marrë Nait Hasani dhe pas rënies se tij në burg Sokol Bashota. Ndërsa, pas kësaj periudhe sipas asaj që tha gjyqtari, Rexhep Selimi ka thënë se nga prilli i 98-ës ishte marrë zëdhënësi i UÇK-së, Jakup Krasniqi dhe Hashim Thaçi.

“Kujtoj që me komunikatat-një prej peronave që është marrë me komunikatat në vitin 1997 është Sokol Bashota, por komunikatat janë hartuar kryesisht në një prej organeve që quhet “Zëri i Kosovës”. Në prill të vitit 1998 ne kemi emëruar zyrtarisht zëdhënës i cili është marrë më pasme komunikatat dhe me paraqitjet e para publike nëpër televizione i cili ka qenë Jakup Krasniqi, ndërkohë i ndihmuar dhe i suportuar nga Hashim Thaçi i cili ka pas detyrë pak më vonë komunikimin me opinionin e kështu ka vazhduar deri në fund për afërsisht”, tha gjyqtari gjatë leximit të deklaratës së Selimit.

Po ashtu, Selimi kishte thënë se nuk e din se cilën nga komunikatat e ka shkruar njëri dhe cilën tjetri. Megjithatë, Bashota mohoi shkrimin e këtyre komunikatave të UÇK-së.

“Unë po e përsërisë që asnjë komunikatë nuk e kam shkruar. Nuk e di kah kjo ide e z.Selimi për t’u përgjigjur kështu, por  unë po e them edhe njëherë që unë nuk kam shkru asnjë komunikatë. Me pas shkru ndonjë herë unë, për opinion unë e kisha pranuar patjetër”, tha ai duke shtuar se ai vetë asnjë rol nuk e ka pasur që ka të bëjë me komunikatat.

Dëshmitarit iu prezantua më pas një deklaratë e Thaçit në 2020-ën për ZPS-në ku sipas gjyqtarit ai kishte thënë se në 96-ës ishte Jashar Salihu përgjegjës për komunikatat.

“Për Jashar Salihun kam degju vetëm mbas lufte, me duket se ka qenë në Fondin e Vendlindja Thërret në perëndim por nuk kam ndonjë informacion të zgjeruar të angazhimit të tij”, tha Bashota.

Krahas kësaj, sipas gjyqtarit pas arrestimit të Nait Hasanit, Thaçi kishte thënë se nuk e din saktësisht, por këto funksionet sa i përket komunikatave i kanë ushtruar dy persona; Bashota dhe Xheladin Gashi.

“Pyetja e radhës që iu bë Thaçit është kjo: A ka pas Nait Hhsani ndonëj rol? Përgjigje; Po se ka qenë përgjegjës, ka qenë udhëheqës i Shtabit Operativ në Kosovë. Pyetje; në 96-ën? Përgjigje; po. Pyetje; Pas arrestimit të Hasanit në janar të 97-ës kush ishte përgjegjës për komunikatat? Përgjigje; të them të drejtën unë në atë kohë kam qenë në Zvicër dhe saktësisht nuk e di por përgjegjësia ka mbetur në atë kohë e angazhimeve operative të Sokol Bashotës por me theks të theksuar të Xheladin Gashit”, tha kryegjyqtari.

Bashota pohoi se pas arrestimit të Nait Hasanit, për një periudhë në Kosovë kanë qenë vetëm ai dhe Xheladin Gashi por që nuk është marrë vetë me komunikatat.

“A mund të na shpjegoni se pse edhe z.Selimi edhe z. Thaçi kur iu është bërë pyetje kanë thënë se ju keni qenë një ndër personat përgjegjës për komunikatat. Keni diçka për të thënë në lidhje me këtë?”, tha gjyqtari.

Pa ju dhënë hapësira dëshmitarit për t’u përgjigjur, atij iu kërkua menjëherë të lirojë sallën për arsye se Thaçi ngriti dorën pasi dëshiroi që të konsultohej me avokatin e tij.

“Me duhet të konsultohem me klientit tim pastaj do të them diçka”, tha avokati Luka Mishetiq.

Si rrjedhojë, Mishetiq kërkoi që t’i lexohet në tërësi transkripta dëshmitarit.

“Klienti dhe unë do të thonim të njëjtën gjë në fakt. Është e drejtë që nëse ia bëjmë këtë pyetje dëshmitarit t’i tregohet shprehimisht ajo që është thënë edhe t’i lexojmë komunikatën përkatëse.  Në fund të faqes iu është bërë një pyetje konkrete dhe thotë; të supozojmë; thotë nuk e di. Tregojani të qartë dhe të plotë transkriptin”, tha Mishetiq.

Më pas dëshmitari u kthye serish në sallën e gjyqit me pyetjen që mbeti në gjysmë pasi iu lexua transkripta e intervistës së Thaçit lidhur me këtë çështje.

“Mua po me kërkohet me hamendësu se çfarë kanë dashtë me thanë këta, por unë mendoj që është më relevante atë që them unë në kuptimin se këtu është fjala për vetën e parë njëjës dhe për atë që unë e di. Për këto jam i vetëdijshëm që po e them nën betim, unë nuk i kam shkru komunikatat as të parën deri tek e fundit. Andaj, supozimin që e kanë dhanë këta nuk i di arsyet, por një mund ë jetë një arsye për vetë faktin që kam qenë në Kosovë. I vetmi prej anëtarëve të Shtabit që ka mbetë në Kosovë. Ndoshta iu kanë referu kësaj, por që kam shkru komunikata kjo nuk është e vërtetë kurrë”, tha Bashota.

Përveç gjyqtari Mettraux, dëshmitari u mor në pyetje edhe nga gjyqtari Fergal Gaynor e po ashtu edhe Luka Mishetiq që përfaqëson Thaçin.

Vlen të theksohet se dëshmia e këtij dëshmitari do të vazhdojë edhe të enjten ku pritet edhe të përfundojë.