Këngëtarja e mirënjohur shqiptare, Adelina Ismaili, ka reaguar ashpër përmes një statusi në rrjetin social Facebook, duke shprehur indinjatën e saj lidhur me debatet e fundit politike në Kosovë.
“Kush do ta besonte që do të arrijnë në pikën ku do ta fyejnë Jusuf Gërvallën? Definitivisht duan t’i përmbysin vlerat”, shkroi artistja, duke kujtuar figurën e veprimtarit dhe patriotit të madh, i cili u flijua për çështjen kombëtare.
Reagimi i Ismailit vjen në një kohë kur vajza e të ndjerit Jusuf Gërvalla, Donika Gërvalla-Schwarz, aktualisht Ministre e Punëve të Jashtme në detyrë, është përfshirë në një debat të ashpër publik. Një ditë më parë, ajo nuk arriti të sigurojë votat e mjaftueshme për t’u zgjedhur Kryetare e Kuvendit të Kosovës.
Situata u bë edhe më e ndjeshme pasi bashkëpartiakja e saj, Shqipe Mehmeti Selimi, refuzoi ta votonte, duke u bazuar në disa deklarata të Gërvallës të bëra në vitin 2020 për bashkëshortin e saj, Rexhep Selimin.
Ky i fundit është një nga katër krerët e UÇK-së (bashkë me Hashim Thaçin, Kadri Veselin e Jakup Krasniqin) që vazhdojnë të gjykohen në Hagë nën akuzat për krime lufte. /Telegrafi/
