Raporti për siguri i Komisionit Evropian, ministri i Brendshëm do të ftohet në interpelancë

Ministri i Punëve të Brendshme, Agim Veliu do të ftohet në interpelancë në Kuvendin e Kosovës. Deputetët do të kërkojnë përgjigje nga ai rreth raportit të Komisionit Evropian, për fushën e sigurisë në Kosovë.

Kjo u bë e ditur në mbledhjen e Komisionit për Çështje të Sigurisë dhe Mbrojtjes, në të cilën gjithashtu u vendos që të ftohet për raportim në komision edhe ministri i Mbrojtjes dhe ushtruesi i detyrës së drejtorit të Policisë së Kosovës.

Kryetarja e komisionit, Fatmire Kollçaku tha se përmes interpelancës do të kërkojnë përgjigje nga ministri Brendshëm, lidhur me vërejtjet e adresuara në Raportin e Komisionit Evropian për fushën e sigurisë.

“Ne kemi pasur probleme që ta kemi ministrin këtu dhe pikërisht kjo ishte arsyeja, meqenëse nuk jemi komision i përhershëm, jemi komisioni funksional, që ne ta ftojmë ministrin në interpelancë, megjithatë ne kemi arritur t’i mbledhim gjashtë nënshkrime të deputetëve të këtij komisioni për ta ftuar ministrin e Punëve të Brendshme në interpelancë. Meqenëse kërkojmë përgjigje, sot nuk po e diskutojmë por ne kërkojmë përgjigje konkrete rreth vërejtjeve të raportit për vendin”, tha ajo.

E deputetja nga radhët e Partisë Demokratike të Kosovës, Ganimete Musliu kërkoi që në takimin e radhës, i ftuar të jetë ushtruesi i detyrës së drejtorit të Policisë së Kosovës.

“Ne kemi bërë disa herë përpjekje për të ftuar ministrin e rendit, Agim Veliu, dhe e kemi të pamundur ta kemi në komision. Konsideroj se tashmë janë pjekur të gjitha kushtet që ne ta kemi në komision ushtruesin e detyrës së drejtorit të Policisë së Kosovës. Kemi raportime gjithandej Kosovës për shumë gjetje, për shumë shkelje të Policisë së Kosovës, dhe është mirë të vijë të na raportojë direkt, ne të informohemi prej dorës së parë dhe jo prej mediave për çdo gjë që po ndodh me Policinë e Kosovës”, tha ajo.

Me propozim të deputetit Bekë Berisha, komisioni është pajtuar gjithashtu që të shkojë për vizitë në Akademinë e Kosovës për Siguri në Vushtrri.

Në këtë mbledhje u vendos edhe që ministri i Mbrojtjes, Anton Quni të ftohet për raportim në komisionin për çështje të sigurisë dhe mbrojtjes në Kuvendin e Kosovës.

Këtë vendim komisioni e mori pas pranimit të raportit të auditorit për Ministrinë e Mbrojtjes për vitin 2019, në të cilin ishte adresuar disa vërejtje.

Deputeti Elmi Reçica tha se ministria duhet të zbatojë rekomandimet e auditorit.

“Nuk kemi çka e diskutojmë çështjen e auditorit, ne vetëm mundemi të kërkojmë që ministria përkatëse t’i zbatojë ato. Ai është institucion i pavarur dhe ne normal që duhet ta marrim si të mirëqenë dhe njëkohësisht me mbikëqyrë sa po i zbatojnë ato rekomandime”, tha ai.

Deputeti Mefail Bajqinovci tha se raporti i auditorit flet për probleme serioze në Ministri të Mbrojtjes dhe në FSK, duke përmendur mungesën e shërbyesve civilë në punë.

Në mbledhjen e sotme komisioni votoi për të proceduar në seancë projektligjin për plotësim dhe ndryshimin e ligjit për letërnjoftim. /KP/Telegrafi/