Rama: Kurrë nuk e kam mbështetur ‘vizatimin’ e kufirit në baza etnike midis Kosovës dhe Serbisë

Kryeministri i Shqipërisë, Edi Rama ka reaguar ndaj lajmit të përditshmes austriake Der Standard lidhur me ndryshimin e kufijve.

Rama me anë të një shkrimi në Twitter ka thënë se, kurrë nuk e ka mbështetur vizatimin e kufijve në baza etnike midis Kosovës dhe Serbisë.

“Des Standard çfarë zhgënjimi që shoh një gazetë me reputacion kaq të lartë të sillet si një shpërndarës i lajmeve të rreme! Unë kurrë nuk kam thënë diçka që lidhet me ‘non-papers dhe harta’. Kurrë nuk e kam mbështetur vizatimin e kufirit në baza etnike midis Kosovës dhe Serbisë”, ka reaguar Rama, përcjell Telegrafi.

.@derStandardat @webstandardat what a disappointement to see such a highly reputated paper behave like a fake news spreader! I have never said any of it about "non paper&map" and I have never ever endorsed any border drawing along ethnic lines between SRB&KOS! #Embarrassing

— Edi Rama (@ediramaal) May 3, 2021

Kujtojmë që në një shkrim të datës 27 prill, gazeta austriake shkruan se, “kryeministri shqiptar Edi Rama i tha medieve në Shqipëri se ai e kishte parë non-paper dhe hartën me ndryshimet e propozuara të kufirit. Vetë Rama, së bashku me Vuçiq dhe lobistë, miratuan vizatimin e kufijve përgjatë vijave etnike midis Kosovës dhe Serbisë tre vjet më parë”.

Që nga mesi i muajit prill e deri më tash, në medie janë publikuar dy të ashtuquajtur “non-paper”, si dokumente të pretenduara, në të cilat flitet për qasje të ndryshme rreth marrëveshjes përfundimtare Kosovë-Serbi.

“Non-paper” i parë, i publikuar më 15 prill, pretendohet të jetë i kryeministrit të Sllovenisë, Janez Jansha i dërguar për Këshillin e Evropës. Ai përmban propozimin e supozuar për ricaktimin e kufijve në Ballkanin Perëndimor, si një mënyrë për të zgjidhur problemin kronik ndërmjet gjashtë vendeve në rajon.

Lexo po ashtu "Non-paper" dhe marrëveshja Kosovë-Serbi, gjithçka çfarë u tha rreth këtij dokumenti

Këto pretendime janë hedhur poshtë nga Jansha, por edhe nga zyrtarë të Bashkimit Evropian.

Më 27 prill, në disa media në Kosovë është publikuar një “non-paper” tjetër, i cili është pretenduar të jetë hartuar nga Gjermania dhe Franca dhe i cili flet për themelimin e të ashtuquajturit “rajon autonom i Kosovës së Veriut” dhe për njohjen e integritetit dhe sovranitetit territorial mes Kosovës dhe Serbisë.

Gjermania e ka hedhur poshtë vërtetësinë e “non-paperit” që u tha se është hartuar nga ajo dhe Franca. /Telegrafi/