Qeveria synon ta rigjenerojë ekonominë e goditur nga pandemia COVID-19

Në vazhdën e vizitave te bizneset private, zëvendëskryeministri Besnik Tahiri bashkë me ministrin e Tregtisë dhe Industrisë, Vesel Krasniqi, vizituan sot një fabrikë në Podujevë, ku shprehën mbështetjen institucionale për bizneset në mënyrë që të rigjenerohet ekonomia e vendit.

Tahiri tha se fokusi kryesor i tyre është që përmes pakos së rimëkëmbjes ekonomike t’iu dalin në ndihmë sektorit privat.

“Përmes Ligjit të Rimëkëmbjes Ekonomike, por edhe përmes buxhetit që e kemi miratuar dje fokus kryesor i qeverisë sonë do të jetë rigjenerimi ekonomik i goditur rëndë nga pandemia. Sektori privat në fund të ditës është sektori më i rëndësishëm, rroga e Veselit dhe rroga ime paguhet prej sektorit privat. Në këtë kuptim ne e kemi detyrë që t’iu dalim në ndihmë dhe t’iu ndihmojmë, mos t’i shohim ndryshe përveç partner strategjik të përmirësimit të gjendjes së pandemisë dhe zhvillimit ekonomik”, tha ai.

Ndërsa, ministri i Tregtisë dhe Industrisë, Vesel Krasniqi tha se shembullin e kësaj fabrike duhet të ndjekin edhe kompani tjetër që gratë të punësohet në sektorin privat.

“Në vizitën e përbashkët që i bëmë këtij biznesi ALKO SHPK një biznes që ka qindpërqind të punësuarve të gjinisë femërore që është një inkurajim për shumë biznese tjera se edhe motrat tona, nënat tona dinë të punojnë sigurisht. Në këtë aspekt mes sa na informoi përfaqësuesi i këtij biznesi shkon për eksport jashtë vendit, në këtë formë bashkë me zëvendëskryeministrin u fascinuam me punën që është duke e bërë ky biznes që ka startuar këtë vit”, u shpreh Krasniqi.

E pronari i kompanisë, Mentor Latifi shpresoi që qeveria do t’iu dal në ndihmë bizneseve pas krizës me pandeminë Covid 19.

“Ne e njoftuam për sukseset dhe sfidat që i kemi gjatë këtij viti… I falënderojmë për mbështetjen që na dhanë… Ne kemi dorëzuar disa plane, jemi në konsultime me qeverinë, po shpresojmë në ndihmën e tyre”, tha ai.

Javët e fundit, zëvendëskryeministri Tahiri ka nisur vizitat në biznese të qyteteve të ndryshme për të shprehur mbështetjen institucionale karshi tyre./kp/Telegrafi/