Putini njoftoi se Rusia ka pezulluar pjesëmarrjen në marrëveshjen për armët bërthamore, reagojnë nga SHBA dhe NATO

Pasi që presidenti rus Vladimir Putin sot gjatë fjalimit të tij me të cilin iu drejtuar kombit rus, njoftoi se Rusia ka pezulluar pjesëmarrjen në marrëveshjen NEW START për kontrollin bilateral të armëve bërthamore, ka ardhur reagimi i parë nga NATO.

Sekretari i Përgjithshëm i NATO-s, Jens Stoltenberg, ka thënë se i vjen keq për vendimin e Rusisë, dhe i bëri thirrje Moskës që ta rishqyrtojë atë vendim, transmeton Telegrafi.

Në një konferencë të përbashkët për shtyp me kreun e diplomacisë ukrainase, Dmytro Kuleba dhe kreun e diplomacisë evropiane Josep Borrell, Stoltenberg tha se “Rusia është agresore”.

Lexo po ashtu Kreu i Wagnerit sulmon verbalisht ministrin rus të Mbrojtjes, thotë se qëllimisht po ua zvogëlon sasinë e armëve dhe municionit

“Presidenti Putin filloi këtë luftë imperialiste, pushtuese. Sot ai e bëri të qartë se po përgatitet për më shumë luftë. Putini nuk duhet të fitojë. Kjo do të ishte e rrezikshme për sigurinë tonë dhe për të gjithë botën”, shtoi Stoltenberg.

“Më vjen keq për vendimin e Rusisë për të pezulluar pjesëmarrjen në programin “New Start”, tha për fund Sekretari i Përgjithshëm i NATO-s.

Pas NATO-s ka reaguar edhe SHBA-ja ku nga Washingtoni është përcjell me vëmendje fjalimi i Putinit, i cili tha se lufta në Ukrainë ishte nxitur nga Perëndimi dhe “regjimi i Kievit”.

Një zyrtar i lartë amerikane tha se ishte një pretendim absurd, duke iu referuar deklaratave të presidentit rus.

“Askush nuk po e sulmon Rusinë”, tha për AFP, Jake Sullivan, këshilltar për Siguri Nacionale në Shtëpinë e Bardhë dhe njëherit këshilltar personal i presidentit amerikan Joe Biden.

“Ideja se Rusia u kërcënua ushtarakisht nga Ukraina apo dikush tjetër është krejtësisht absurde, kjo ide nuk ka absolutisht asnjë kuptim”, shtoi Sullivan. /Telegrafi/