Princi Philip, bashkëshorti i ndjerë i Mbretëreshës Elizabeth II, u përball me sfida të mëdha dhe bëri sakrifica të mëdha për t’u përshtatur me rolin e tij në Familjen Mbretërore – dhe priste të njëjtën gjë nga çdo kush që i bashkohej asaj.
Kjo është edhe arsyeja pse ai ishte “shumë i zhgënjyer” me Meghan Markle, sipas biografes mbretërore Ingrid Seward.
Sipas saj, Princi Philip nuk e kuptonte pse Meghan nuk mund të ndjekë rrugën që ai vetë kishte ndjekur dekada më parë – të heqë dorë nga karriera dhe të mbështesë bashkëshortin dhe monarkinë, shkruan DailyMail.
Pas martesës me Princin Harry në 2018, Meghan dhe Harry u përfshinë në një sërë përplasjesh me institucionin mbretëror, që çuan në largimin e tyre si anëtarë aktivë të familjes mbretërore në janar 2020.
Philip – që kishte lënë shtetësinë greke dhe daneze, karrierën në Marinën Mbretërore dhe madje mbiemrin e tij për hir të Mbretëreshës – e shihte këtë si një mungesë përkushtimi nga Meghan.
Ai, sipas Seward, e konsideronte të papranueshme që ajo nuk mund të hiqte dorë nga karriera e saj si aktore dhe të mbështeste bashkëshortin e saj siç kishte bërë ai për Elizabethën.
Kur u thirr “Samiti i Sandringham” për të diskutuar të ardhmen e Harry dhe Meghan në monarki, Philip refuzoi të marrë pjesë. Sipas burimeve, ai ishte kaq i irrituar nga situata saqë u largua nga rezidenca përpara mbërritjes së të tjerëve.
Sakrificat e Philip nuk ishin vetëm personale. Ai jetoi për më shumë se shtatë dekada në krah të Mbretëreshës, duke u përfshirë në qindra organizata dhe duke qenë një shtyllë e rëndësishme e jetës publike britanike.
Përkushtimi i tij u vlerësua edhe nga vetë Elizabeth II, e cila në jubileun e saj të diamant tha: “Ai ka qenë forca dhe udhërrëfyesi im i vazhdueshëm”.
Për Philipin, mbështetja ndaj Kurorës dhe detyra ndaj kombit ishin të shenjta – dhe çdo shmangie nga kjo rrugë e konsideronte si tradhti ndaj rolit mbretëror. Ky ishte thelbi i zhgënjimit të tij ndaj Meghan Markle.
Ai nuk e pa thjesht si një zgjedhje personale, por si një thyerje të detyrës që lidhet me privilegjin e të qenit pjesë e familjes më të fuqishme simbolikisht në botë. /Telegrafi/
