Prokuroria nuk ka gjetur elemente të veprës penale te Bekim Maksuti për “air traktorët”

Ish-drejtori i Drejtorisë për Mbrojtje dhe Shpëtim, Bekim Maksuti nuk do të mbajë përgjegjësi për “air traktorët” e pa servisuar që nuk ishin në funksion gjatë zjarreve të mëdha në verën e vitit 2021.

Prokuroria, duke vepruar sipas kallëzimit penal të “Të Majtës”, nuk ka konstatuar elemente të veprës penale as për procedurat e prokurimit publik për riparimin dhe servisimin e avionëve, as për punën e Maksutit.

“Pas kallëzimit të një partie politike, ka vepruar Prokurori Publik i Prokurorisë Publike, i cili në procedurë para hetimore ka siguruar prova materiale nga të cilat ka rezultuar se veprimet e ndërmarra nga drejtori i Drejtorisë për Mbrojtje dhe Shpëtim nuk përmbajnë elemente të natyrës juridike të veprës penale që është në kompetencë të Prokurorisë Publike Themelore për Ndjekjen e Krimit të Organizuar dhe Korrupsionit, sepse provat e mbledhura tregojnë se procedurat e prokurimit publik për riparimin dhe servisimin të avionëve në vitin 2020 dhe 2021 janë realizuar në përputhje me dispozitat e Ligjit për Prokurim Publik”, thonë nga Prokuroria.

Prokuroria njofton gjithashtu se në Prokurorinë Themelore Publike në Shkup është hapur rast në bazë të raportit të auditimit të performancës “Sistemi për menaxhimin e krizave dhe mbrojtje nga zjarri” nga Enti Shtetëror i Revizionit, i cili është në fazën para-hetimore.

Traktorët e ajrit, të cilët mund të përdoren për të luftuar zjarret në pyje nga ajri, mbetën të bllokuar në vitin 2021. Më pas Maksuti zbuloi se avionët nuk ishin në funksion prej dy vitesh sepse nuk kishte kush t’i servisonte, domethënë nuk kishte asnjë kompani të autorizuar për t’i servisuar.

Problemi me “Airtractors” ka qenë aktual edhe këtë vit, kur u krye servisimi, por nuk kishte pilotë, për shkak të daljes në pension të dy pilotëve të vetëm. Me vendim të Qeverisë ata janë ri-punësuar me kontratë pune./Telegrafi/