Prodhuesi i veturave elektrike Lordstown planifikon të padisë Foxconn

Lordstown Motors të premten deklaroi se planifikon të ndërmarrë veprime ligjore kundër investitorit Foxconn për të siguruar që prodhuesi tajvanez me kontratë të përfundojë një blerje të planifikuar të gati 10 për qind të aksioneve të startup-it të veturave elektrike.

Kompania dhe partnerët e saj të veturave elektrike kanë qenë në vështirësi pasi qasja në kapital kufizohet nga rritja e normave të interesit dhe pasiguria ekonomike.

Prodhuesi i veturave elektrike kishte paralajmëruar më herët se mund të detyrohet të paraqesë falimentimin, duke përmendur pasigurinë për një marrëveshje investimi prej 170 milionë dollarësh me Foxconn, përmes së cilës kompania tajvaneze do të mbante një aksion gati 20 për qind në firmën amerikane, raporton Reuters, transmeton Telegrafi.

Foxconn aktualisht mban pak më shumë se 8 për qind të aksioneve në kompani, sipas të dhënave të Refinitiv. Foxconn që atëherë ka investuar 52.7 milionë dollarë dhe po pengon blerjen e aksioneve shtesë, duke përmendur një shkelje të marrëveshjes së tyre, bënë të ditur nga Lordstown.

Të premten, kompania amerikane, e cila mban emrin e qytetit ku edhe ka bazën, nëpërmjet një dosje të dorëzuar tha se besonte se Foxconn nuk kishte gjasa të përfundonte blerjen e premtuar, duke përmendur një letër që prodhuesi i kontraktuar i dërgoi Lordstown në fillim të këtij muaji, në të cilën kompania tajvaneze nuk e pranoi mbylljen e përbashkët.

“Kompania beson se shkeljet e ndryshme të marrëveshjes së investimit nga Foxconn dhe modeli i keqbesimit kanë shkaktuar dëm material dhe të pariparueshëm për kompaninë”, shtoi Lordstown në dosjen e dërguar në gjykatë. /Telegrafi/