Pretendohet për dëm 600 mijë euro në blerjet e rezervave shtetërore, Muja: Dosja e Prokurorisë ka gabime elementare

Prokuroria Speciale e Kosovës ka gjetur se përpos procedurës së kundërligjshme që është ndjekur në blerjet e rezervave shtetërore ka edhe shkelje të tjera pasi malli i paguar s’ka mbërritur në Kosovë.

Kështu, sipas dosjes së Prokurorisë, pavarësisht se janë paguar paratë te kompanitë turke e polake për grurë, vaj e sheqer në Kosovë nuk kanë ardhur kurrë 200 mijë litra vaj, 120 mijë kilogramë sheqer dhe 52.5 tonelata grurë. Vlera e këtij malli që nuk ka mbërritur në Kosovë, sipas Prokurorisë, është mbi 600 mijë euro.

Lidhur me këtë ka reaguar deputeti i Lëvizjes Vetëvendosje, Armend Muja duke thënë se kjo dosje ka gabime elementare.

“Dosja e prokurorit është e shkoqitur nga konteksti dhe ka gabime elementare. Me gjasë zyrtarët janë arrestuar pa u dëgjuar fare”, thotë Muja në reagimin e tij në Facebook.

Ai ka shtuar duke thënë se nuk janë të vërteta pretendimet se është shkelur procedura e prokurorimit, e as se është kufizuar konkurrenca.

“Është dëmtuar buxheti për 601,000 euro – ose po mungon një shpjegim shtesë ose Prokurori nuk e din matematikën elementare. Do të duhej të ishte 301,384 euro jo 601,000 euro. Në dosje thuhet se 276,000 euro vaj/sheqer ende nuk ka ardhur dhe mungojnë 52.5 tonë (25,383 mijë euro). Çmimi i negociuar i grurit dhe vajit – është brenda margjinës së çmimeve në berzë gjatë mars 2022 (460-500 për ton). Çmimi i negociuar në kontratën e MINT ka qenë 484 euro për ton. Në rast se në çmim është përfshirë edhe transporti, mund të jetë kontratë shumë e favorshme për atë kohë. Çmimi i vajit të negociuar ishte afërsisht 1.1 euro – më lirë se çmimi në tregun e Kosovës në atë kohë. Për rikujtim çmimi i vajit në Kosovë ato ditë kishte shkuar në 3.49 euro për litër”, ka shtuar ai.

Lexo po ashtu Dosja e Prokurorisë: 52.5 tonë grurë, 200 mijë litra vaj dhe 120 mijë kg sheqer, që nuk erdhën në Kosovë

Muja ka thënë se dosja nuk specifikon afate kohore se kur duhej të arrinte malli, e nuk specifikohet nëse ka të bëjë me vonesë apo mungesë.

“Vetëm prokurorët e gjykatësit në Kosovë e kanë luksin e kohës”, përfundon Muja.

Në dosjen e Prokurorisë, thuhet se biznesmeni Ridvan Muharremi ishte personi kyç që kishte zhvilluar negociatat me operatorët ekonomikë për blerjen e grurit, vajit e sheqerit.

Muharremi ngarkohet se në mënyrë të kundërligjshme kishte ndihmuar Irfan Lipovicën dhe Haviz Garën. Iu kishte krijuar kushte për negocimin me kompanitë turke e polake për blerjen e grurit, vajit dhe sheqerit. /Telegrafi/