Arrestohen dy persona në Viti, dyshohet për ‘organizim të skemave piramidale dhe bixhozit të paligjshëm’

Policia e Kosovës, ka njoftuar se ka arrestuar dy persona në Viti, pasi që të njëjtit dyshohen të kenë organizuar ‘lojëra të fatit’, në mënyrë të kundërligjshme.

Policia ka njoftuar se me qëllim të identifikimit të personave dhe lokacioneve ku zhvilloheshin këto lojëra, kontrollet janë kryer në 12 lokacione, ku edhe janë konfiskuara dëshmi relevante, transmeton Telegrafi.

“Njësiti i Hetimeve Kundër Krimeve Ekonomike dhe Korrupsionit (NJHKEK) – Gjilan, ka pranuar informata nga njësitet policore, ku dyshoje se në disa lokacione në Komunën e Vitisë, janë duke u organizuar ‘lojëra të fatit’ në mënyrë të kundër ligjshme.

Policia, ka siguruar nga gjykata urdhër kontroll, të cilin e ka zbatuar, më 02.07.2019, me qëllim të identifikimit të personave dhe lokacioneve ku zhvilloheshin këto lojëra. Kontrolle janë kryer në 12 lokacione. Në dy nga këto lokacione policia ka konfiskuar dëshmi relevante dhe ka arrestuar dy të dyshuar: P.H. viti i lindjes 1978 f.k.sh dhe G.A. viti i lindjes 1996 m.k.sh.

Kurse, si dëshmi relevante në lokacionin ku është arrestuar e dyshuara e parë, janë konfiskuar: pesë shtëpiza kompjuteri, një printer që ka shërbyer për lojëra të fatit ‘Keno, Racing Dogs dhe Bastore’, kurse në lokacionin ku është arrestuar i dyshuari i dytë janë konfiskuar: dy shtëpiza kompjuteri, një printer që ka shërbyer për lojëra të fatit ‘Keno dhe Racing Dogs’”, thuhet në njoftimin e Policisë së Kosovë.

Me aktvendim të prokurorit kujdestar që të dy të dyshuarve u është shqiptuar masa e ndalimit prej 48 orëve./Telegrafi/