Për të apasionuarit ndaj gatimit, nga nesër “Gurmania Channel” vjen me katër ditë emision (Foto)

Për të gjithë të apasionuarit pas gatimit, “Gurmania Channel” vjen me 96 orë transmetim në fusha të ndryshme të gastronomisë. “Gurmania Channel” do të fillojë transmetimin nesër (e mërkurë, më 28 dhjetor) nga ora 10:00 dhe do të mbarojë në natën e Vitit të Ri, më 31 dhjetor të këtij viti.

Përgjatë katër ditëve sa do të transmetohet, ata të cilët e duan gatimin do të kenë mundësinë të shohin gatime tradicionale shqiptare, gatime speciale të produkteve të qumështit, gatime të veçanta të pastave, pjekurina, brumëra, ushqime deti, sandviçë, gatime vegjetariane, sallata dhe ushqime nga skara.

Disa nga emisionet që do të transmetohen gjatë këtyre katër ditëve, sa do të zgjasë edhe programi i “Gurmania Channel”, janë: “LaPasta”, “Shumë & Shijshëm”, “StarChef”, “Qumështi”, “Brumërat”, “Shpejt & Shijshëm”.

Emisionet do të moderohen nga njerëz të profileve të ndryshme, do të ketë edhe kryekuzhinierë të njohur, si dhe njerëz të famshëm. E veçanta e këtyre emisioneve që do të transmetohen në kanalin zyrtar në YouTube të Gurmania Channel, është se do të jenë në gjuhën shqipe.

Përpos kanalit zyrtar në YouTube, “Gurmania Channel” do të transmetohet live edhe në portalin Telegrafi.com. Partnerë të “Gurmania Channel” janë portali Telegrafi.com, platforma Gjirafa dhe Radio Televizioni Dukagjini. /Telegrafi/